Në muajin e ndërgjegjësimit për kancerin e gjirit, 60 vjeçarja nga Prizreni rrëfen se si mbijetoi në 2016-tën për të jetuar sot. Violeta Pirana kujton periudhën kur u diagnostifikua me kancerin e gjirit derisa tregon sfidat, vështirësitë si dhe motivet që nuk e lejuan të dorëzohet lehtë.
Edhe pas betejës me sëmundjen, kontrollat vazhdojnë të jenë rutinë për të. 2016- ta për Violeta Piranën ishte periudha më e rëndë në jetën e saj. Në janar të atij viti, 60 – vjeçarja nga Prizreni u diagnostifikua me kancer të gjirit.
Mirëpo edhe pas shtatë viteve nën emocione rrëfen se si arriti të mbijetojë.
“Një lajm i tillë është shumë i rëndë, unë e kam përjetuar rëndë sepse sëmundja nuk të troket në derë ajo vetëm të vjen andaj ka qenë si një eksplodim i bombës të cilën nuk e kam ditë se e kam dhe planet e mija u tollovitën tërësisht në mendjen dhe dijen time pastaj nuk e kam ditë se çfarë do të pasojë pas asaj”, është shprehur Violeta Pirana.
Përveç saj, lajmin e përjetuan rënd edhe familjarët për të cilët thotë se ishte një goditje e fortë.
“Kam dy vajza, njëra ka qenë në Prishtinë e tjetra në Sarajevë dhe ajo që ka jetuar në Sarajevë ka pas një shtatzëni të vështirë pas dhjetë vitesh dhe neve kemi vendos që asaj mos me i tregu për kancer, por një gjë që kurr nuk ia fali vetes dhe e këshilloj që asnjë person të mos e komunikoj këtë lajm përmes telefonit. Unë nga ankthi e komunikova vajzën përmes telefonit dhe më pas e mora vesh se çfarë ankthi ka përjetuar ajo sa që janë ngrit në këmbë i gjithë kolektivi me e qetësu, dmth ka qenë një goditje shumë e rëndë për familjen tonë sepse sa kemi qenë në një fazë të qetë të jetës të gjitha gjërat u tollovitën dhe është dasht të kthehemi në trajtime”, ka deklaruar Pirana.
Trajtimet me kimioterapi, por edhe dy muaj rrezatime në atë kohë i mori në Turqi.
Ndonëse hasi në vështirësi financiare gjatë trajtimit, e rëndësishme për të mbetet fitimi i betejës me këtë sëmundje.
“E kam përfundu në Turqi, ka qenë shumë e kushtueshme është dashte me shku në mëngjes me aeroplan dhe në mbrëmje të kthehem për shkak të kursimit që mos me shpenzu sepse kimioterapia ka qenë e kushtueshme, mirëpo nuk janë të rëndësishme paratë sa është jeta. Pra unë kam fituar në jetë”, ka rrëfyer Pirana.
Tutje ajo tregon motivet që nuk e lejuan të dorëzohet lehtë e të luftojë kancerin.
“Dëshira për me jetu, e kisha një mbesë dojsha me shëtis me të, vet, kisha plane të mija që po realizohen dalëngadalë e formova edhe shoqatën”, ka treguar ajo.
