Është dashur të ishin në vendet e tyre të punës.
Por, punëtorët e Flotacionit në Kishnicë, sot nisën grevën.
Ky bojkotim i punës po vjen për shkak të mos ekzekutimit të pagave të muajit mars.
“Arsyeja kryesore është mos realizmi i pagave për muajin mars edhe kërkesat e tjera janë nivelizimi i pagave në nivel të kombinatit. Janë kushtet në punë edhe mosekzekutimi i mjeteve të trustit. Trustit që dy vite nuk na ka qitë paret, paret i ndal… Siguria në punë, veshmbathje, shumë gjëra ka këtu që mungojnë”, ka deklaruar kryetari i Këshillit Grevistë, Xhevdet Zymeri.
Zymberi kërkon nga bordi i ndërmarrjes “Trepça” që t’i dëgjoj hallet e tyre.
“Kisha pas dëshirë me u merr më shumë me punëtorët, jo vetëm me i marr pagat e me qëndruar në zyre. Këtu te ne, nuk vijnë kurrë edhe ne jemi drejt për drejtë të kyçë në prodhim se çka prodhohet në Artan ne e riprodhojmë këtu, por nuk merren me neve kurrë”.
Pas disa orësh në grevë, Zymberit me kolegë u erdhi lajmi i mirë.
Pagat u ekzekutuan.
“Mjetet financiare janë siguruar nga eksporti i realizuar më 18.04.2025 nga njësia në Stan Tërg, dhe janë shfrytëzuar për mbulimin e pagave të njësisë në Kishnicë. Në këto momente, pagat për Flotacionin janë ekzekutuar në tërësi”, thuhet në postim.
Por, ky nuk është shqetësimi i vetëm i punonjësve të Flotacionit në Kishnicë.
“Po mu personalisht më është ekzekutuar paga, por se çka do të bëjmë me pagën tjetër. Menaxhmenti nuk ka bërë investime në minierë kryesorë atje, te ne kemi mungesë të punëtorëve shumë. Te ne një punëtorë i ka tre vende të punës, unë personalisht punojë flloter, punojë nganjëherë edhe elektricistë prej zorit, se kem pak mungesë të elektricistëve”, ka deklaruar floteri, Skënder Maliqi.
Kërkesë tjetër e këtyre punëtorëve është edhe nivelizimi i pagave.
Gjendja e rëndë në Flotacion erdhi si pasojë e mungesës së investimeve.
“25 vite këtu nuk është investuar asgjë. Asnjë investim nuk është bërë këtu, asnjë investim kapital nuk është bërë, punohet me makineri që janë me shkronja SSSR Bashkimit Sovjetik, viteve të 60 kur është ndërtuar kjo, kurrë më asnjë diçka e re nuk është investuar këtu. Na punojmë, domethënë harrnohemi, unë nuk e di qysh mundet me prit kualitet e rezultat 100% prej një uzine që punon kështu me puls të fundit, para vdekjes jemi, gjithçka është e demolume e rrënomë”, tha floteri, Jasin Vërtopi.
Ndërmarrja “Trepça” është ballafaquar në vazhdimësi me probleme financiare.
