Aktivistja e njohur për klimën, Greta Thunberg, dhe 11 aktivistë të tjerë u nisën të dielën pasdite drejt Rripit të Gazës me një anije me vela, në një përpjekje për të thyer bllokadën izraelite dhe për të sjellë ndihma humanitare në territorin e shkatërruar nga lufta, njoftuan organizatorët.
Anija Madleen, që operohet nga grupi Freedom Flotilla Coalition, u nis nga porti i Catanias në Siçili dhe synon të arrijë brigjet e Gazës brenda shtatë ditëve, nëse nuk ndalohet nga autoritetet izraelite.
Aktivistët deklaruan gjatë një konference për shtyp përpara nisjes se misioni ka për qëllim rritjen e ndërgjegjësimit ndërkombëtar për krizën humanitare në Gaza.
“Po e bëjmë këtë sepse duhet të përpiqemi, pavarësisht sa të vogla janë shanset tona,” tha Thunberg mes lotësh.
“Momenti kur ndalojmë së përpjekuri është momenti kur humbasim njerëzimin tonë. Dhe, sado i rrezikshëm të jetë ky mision, ai nuk është asgjë në krahasim me rrezikun që përfaqëson heshtja e botës përballë një gjenocidi të transmetuar drejtpërdrejt.”
Izraeli e ka mohuar me vendosmëri akuzën për gjenocid, duke e cilësuar si një “shpifje antisemite” të pabazuar.
Në mesin e atyre që ndodhen në bord janë aktori i serialit “Game of Thrones”, Liam Cunningham, si dhe Rima Hassan, një eurodeputete franceze me prejardhje palestineze, së cilës i është ndaluar hyrja në Izrael për shkak të kritikave të saj ndaj ofensivës izraelite në Gaza.
Kjo është përpjekja e dytë e këtij grupi për të arritur Gazën nga deti brenda pak javësh. Një anije tjetër e flotiljes, e quajtur “Ndërgjegjja”, u detyrua të kthehej në fillim të majit pasi u sulmua nga dy dronë të dyshuar në ujërat ndërkombëtare pranë Maltës, raporton AP.
Aktivistët fajësuan Izraelin për incidentin, i cili dëmtoi pjesën e përparme të anijes.
Sipas Ministrisë së Shëndetësisë në Gaza, Izraeli ka vrarë mbi 52,000 palestinezë, shumica gra dhe fëmijë.
Operacionet ushtarake kanë shkaktuar shkatërrim të gjerë dhe kanë lënë pjesën më të madhe të popullsisë pa strehë.
Aktivisti Thiago Ávila tha se përpjekja për të thyer rrethimin nga deti është pjesë e një strategjie më të gjerë.
Ai përmendi “Marshimin Global drejt Gazës”, një iniciativë ndërkombëtare që pritet të nisë së shpejti nga Egjipti dhe të arrijë në pikën kufitare Rafah në mes të qershorit.
Marshimi do të përfshijë mjekë, avokatë, gazetarë dhe aktivistë që do të kërkojnë ndërprerjen e ofensivës izraelite dhe rihapjen e kufirit për ndihma.
Nisja e flotiljes përbën një tjetër akt simbolik sfidues përballë një konflikti që ka shkaktuar pasoja të rënda humanitare dhe tensione në rritje në arenën ndërkombëtare.
