Deputeti i zgjedhur i Lëvizjes Vetëvendosje, Ardian Gola, ka deklaruar se lirimi i ish-krerëve të Ushtrisë Çlirimtare të Kosovës, të cilët po gjykohen në Hagë, do të kishte rëndësi shumë më të madhe sesa çdo rezultat zgjedhor në Kosovë.
Në emisionin “Këndi i Debatit” në Tëvë1, Gola u pyet nëse vendimi që pritet të shpallet më 16 shtator mund të ndikojë në skenën politike dhe në balancat elektorale në vend.
Sipas tij, edhe nëse lirimi i tyre do të ndikonte në rezultatin zgjedhor të LVV-së, ai do ta pranonte një gjë të tillë.
“Nëse shpallja e tyre të pafajshëm do t’i destabilizonte ekuilibrat politikë në Kosovë, do të ngjallte emocione të reja dhe do të riorientonte votën, madje edhe nëse Lëvizja Vetëvendosje nuk do ta kalonte fare pragun zgjedhor, unë do të isha shumë më i kënaqur që ata të kthehen të pafajshëm. Çmimi që Kosova do ta paguante në rast të një vendimi të kundërt do të ishte i pakrahasueshëm në aspektin ndërkombëtar. Mendoj se do të ishte kthimi më i madh për të keq në historinë ndërkombëtare të Kosovës nëse ata dënohen”, ka deklaruar Gola.
Ai tha se ka bindje të plotë në pafajësinë e ish-krerëve të UÇK-së dhe e cilësoi procesin gjyqësor si politik.
“Besimi im i thellë është se ata janë të gjithë të pafajshëm dhe po përballen me një proces që unë e konsideroj politik, i ndërtuar për të neutralizuar raportin e Serbisë me Kosovën. Shpresoj që ata të dalin të pafajshëm”, është shprehur ai.
Gola tha gjithashtu se nuk beson se kthimi i tyre do të ndryshonte në mënyrë të ndjeshme skenën politike në Kosovë.
“Unë nuk besoj se rikthimi i tyre do të ishte i atyre përmasave sa ta trondiste skenën elektorale dhe politike në Kosovë. Mendoj se Albin Kurti është në kulmin e fuqisë së tij politike dhe është koha e tij. Fatkeqësisht për Kosovën, ai mbetet një lider pa një kundërshtar të fuqishëm. Më vjen keq për secilin lider opozitar, por nuk mendoj se janë konkurrentë të tij në aspektin politik”, ka përfunduar Gola.
