Analisti politik, Ejup Gojnovci ka vlerësuar se ish-presidentja e vendit, Vjosa Osmani, dhe kryeministri në detyrë, Albin Kurti, do ta përdorin diasporën e Kosovës si target të votave në zgjedhjet e parakohshme parlamentare që do të mbahen më 7 qershor.
Duke komentuar adresimet e Kurtit dhe Osmanit përmes videomesazheve, me të cilat të martën u kanë bërë thirrje bashkatdhetarëve të regjistrohen për të votuar, Gojnovci ka thënë se ky veprim është i duhur, pasi mobilizimi i tyre është në dobi të demokracisë në Kosovë.
“Edhe Kurti edhe Osmani patjetër që do ta përdorin diasporën si target për vota. Të dy kanë një përkrahje të mirë në mërgatën e Kosovës. I dëgjova adresimet e tyre dhe kanë bërë mirë, sepse mobilizimi është në dobi të demokracisë dhe të shtrirjes më të gjerë të votës demokratike. Ata janë qytetarë të Kosovës, kanë familjet këtu dhe japin kontribut për vendin. Diaspora jonë nuk është për t’u nënçmuar, prandaj përfshirja e tyre është e duhur”, ka thënë ai.
Sipas tij, vota e diasporës do të kanalizohet kryesisht në Lëvizjen Vetëvendosje dhe Lidhjen Demokratike të Kosovës.
Ai ka shtuar se Osmani pritet të ketë rol të rëndësishëm në mobilizimin e votuesve për LDK-në, ndërsa LVV-ja do të ruajë epërsinë në diasporë.
“Osmani ka qenë e pranishme dhe e pranueshme në diasporë dhe mendoj se do të ketë rol të madh në mobilizimin e votës për LDK-në. Megjithatë, primatin në diasporë, edhe sipas të dhënave të KQZ-së, e mban Lëvizja Vetëvendosje dhe Albin Kurti. Kurti nuk lë asgjë rastësisë; ai është një politikan me shumë energji për të arritur suksese maksimale. Edhe në këto zgjedhje nuk pres ndonjë ndryshim të madh – vota e diasporës do të kanalizohet kryesisht në këto dy parti, por me shumicë në LVV, për shkak të relacionit të ndërtuar me mërgatën”, ka përfunduar ai.
