Një lajm i hidhur ka ardhur nga Zvicra për të gjithë dashamirët e futbollit dhe veçanërisht për tifozët e Grasshopper Club Zürich.
Leart Kabashi, talenti 17-vjeçar shqiptar që konsiderohet si një nga lojtarwt premtues të akademisë së klubit, do të mungojë për disa muaj për shkak të një dëmtimi serioz.
Mesfushori qendror, i cili sezonin e kaluar bëri debutimin në Superligën zvicerane dhe arriti të shënojë një gol në vetëm tre paraqitje, pritej të ishte pjesë e rëndësishme e skuadrës këtë sezon.
Gjatë një stërvitjeje në kampin përgatitor në Crans-Montana javën e kaluar, Kabashi pësoi një frakturë në kockën e mesit të këmbës (metatars), një dëmtim që do ta mbajë larg fushave për rreth tre muaj. Kjo do të thotë se rikthimi i tij pritet të ndodhë jo më herët se mesi i tetorit.
Ky është një moment jashtëzakonisht i vështirë për Kabashin, i cili ishte në prag të një shpërthimi në ekipin e parë dhe konsiderohej si një pjesë kyçe e së ardhmes së Grasshopper. Tani, fokusi i tij do të jetë në rikuperimin dhe rikthimin sa më të shpejtë dhe të plotë në fushë.
