Presidenti i Shoqatës së Gjysmëhënës së Kuqe Palestineze, Younis Al Khatib, deklaroi të enjten se asnjë civil në Rripin e Gazës nuk ka përfituar nga ndihmat humanitare që kanë hyrë këtë javë përmes kufirit, duke i cilësuar përpjekjet si të pamjaftueshme dhe potencialisht të rrezikshme.
“Askush nuk ka marrë ndihmë. Asnjë civil nuk ka përfituar ende,” tha Al Khatib në një konferencë për shtyp të mbajtur në Gjenevë.
Ai sqaroi se shumica e kamionëve me ndihma janë ende të bllokuar në pikën kufitare të Kerem Shalom, ku po kontrollohen, por nuk janë shpërndarë brenda Gazës.
Dërgesat e kufizuara, sipas tij, janë më shumë një rrezik sesa një zgjidhje për krizën. “Ky është një mesazh vdekjeje. Njerëzit po vdesin nga uria,” paralajmëroi Al Khatib. Ai shtoi se mungesa e ndihmës po nxit dëshpërim të thellë dhe parashikoi shpërthime të dhunës për të mbijetuar, raporton Anadoly.
“Raportet që po marrim tregojnë për fëmijë që po humbin jetën nga uria. Thuajse 90% e fëmijëve janë në prag të urisë së rëndë,” tha ai.
Në të njëjtën ngjarje në Gjenevë, Ministri palestinez i Shëndetësisë, Majed Abu Ramadan, konfirmoi se vetëm në dy ditët e fundit janë shënuar 29 vdekje – të gjitha mes fëmijëve dhe të moshuarve – për shkak të mungesës së ushqimit.
Ai i përshkroi këto si “vdekje të lidhura drejtpërdrejt me urinë”.
Kriza humanitare në Gaza po thellohet ndërsa ndihmat e kufizuara dhe të vonuara nuk arrijnë të përmbushin nevojat jetike të popullsisë së rrethuar.
