Dukagjini dhe Gjilani kanë luajtur baras 0-0 në kuadër të xhiros së 21-të në Superligë.
Megjithatë kjo ndeshje u mbyll me ankesat e mëdha të skuadrës mysafire që pretendonin se janë dëmtuar në dy raste me mos dhënie të penalltisë në favor të tyre nga gjyqtari Mervan Bejtullahu.
Ka pasur komente të shumta në rrjetet sociale kundër gjyqtarit Bejtullahu, i cili tani ka dalë duke kërkuar falje publike.
Bejtullahu ka hequr gjithë përgjegjësinë prej vetës duke thënë se nuk është thirrur nga VAR, por ai gjithsesi ka kërkuar falje Gjilanit dhe tifozëve të tyre Skifterave.
Postimi i plotë nga Mervan Bejtullahu (pa ndërhyrje):
Përshëndetje të gjithë dashamirëve të futbollit,
Pas një karriere të gjatë dhe të përkushtuar, mbi 17 vite në Kosovë dhe vitet e fundit edhe në arenën evropiane, ku kam pasur privilegjin të gjykoj ndeshje të rëndësishme, sot ndjej nevojën të bëj diçka që nuk e kam bërë kurrë më parë: të kërkoj falje publike.
Analiza e thellë e videos nga ndeshja KF Dukagjini – SC Gjilani, e zhvilluar më 23 shkurt, ku unë isha referi kryesor, kam zbuluar dy gabime të rënda. Në minutën e 15-të dhe në minutat shtesë, kam neglizhuar dy penallti të qarta dhe të padiskutueshme në favor të Gjilanit.
Pavarësisht pamjeve të qarta dhe teknologjisë VAR, nuk jam thirrur për rishikim në asnjë prej këtyre rasteve. Jam plotësisht i bindur se, nëse do të më ishte dhënë mundësia të rishikoja pamjet, do të kisha akorduar të dyja penalltitë. Në rastin e pare nuk isha i bindur, ndërsa në të dytin pozicionimi im i largët për shkak të një kundërsulmi ndikoi në gjykimin tim. Megjithatë, kjo nuk e justifikon gabimin tim.
Kërkoj ndjesë të sinqertë ndaj klubit të SC Gjilanit, tifozëve-SKIFTERAVE dhe gjithë qytetit për këto gabime të paqëllimshme.
Dhe në fund unë ende nuk e di arsyen se pse VAR-i nuk më ftoi dhe në të dyja rastet vendosi në favor të ekipit të KF Dukagjinit.
Me sinqeritet të plotë, shpresoj që kjo ndjesë të shërbejë si një shenjë e pendesës sime të thellë. Unë i marr këto gabime shumë seriozisht dhe do të punoj vazhdimisht për të përmirësuar gjykimin tim dhe për të siguruar që standardet e arbitrimit të jenë sa më të larta në të ardhmen.
