Faqja zyrtare e tifozëve të skuadrës së FC Malishevës, ka reaguar ashpër ndaj vendimit të FFK-së për delegimin e gjyqtarëve për ndeshjen Malisheva – Dukagjini.
Sipas Fan Club Malisheva, gjyqtari kryesor i deleguar për këtë ndeshje, Egzon Dakaj, ka qenë i njëjti që në përballjen e kaluar ndaj KF Dukagjinit në Klinë mori vendime që dëmtuan drejtpërdrejt klubin nga Malisheva.
“Gjyqtari kryesor Egzon Dakaj ka qenë i njëjti që në përballjen e kaluar ndaj KF Dukagjinit në Klinë mori vendime që na dëmtuan drejtpërdrejt. Tani, sërish është deleguar për ndeshjen e radhës ndaj të njëjtit kundërshtar, këtë herë në Malishevë.
Si tifozë dhe si komunitet që e ndjek me përkushtim klubin tonë, kërkojmë drejtësi dhe gjykim të paanshëm. Malisheva meriton respekt dhe trajtim të barabartë në çdo ndeshje”, shkruan në reagim.
Tutje shkruan se tifozët do të jenë në stadium për ta mbështetur ekipin, por presin që drejtësia në fushë të mos vihet në pikëpyetje.
Përveç reagimit të tifozëve, Tëvë 1 mëson se edhe klubi do të dërgoj një ankesë në drejtim të Federatës së Futbollit të Kosovës, për delegimin dhe sjelljen e gjyqtarëve në raport me klubin e Malishevës.
