Ndeshja që përcakton titullin e kampionit në Superioren e Shqipërisë, do të drejtohet nga gjyqtarë të huaj.
Finalja e “Final 4” ku do të përballen Partizani dhe Egnatia është ndeshja e fundit e këtij edicioni në Shqipëri dhe për të hequr dilemat, FSHF-ja ka angazhuar gjyqtarë anglez.
Anthony Taylor do të jetë gjyqtari kryesor, Gary Beswick e Adam Nunn janë asistentët e tij kurse sistemi VAR i është besuar Robert Jonesit.
Këta gjyqtarë janë me përvojë dhe ndajnë drejtësinë në kampionatin anglez. Treshja Taylor, Beswick e Nunn ndanë drejtësinë edhe në duelin e parë gjysmëfinal të Championsit mes Dortmundit e PSG-së, ndërsa edicionin e fundit ishin në finalen e Ligës së Evropës ku u përballen Sevilla dhe Roma.
Po ashtu, kjo treshe është përzgjedhur për të ndarë drejtësinë edhe në ndeshjet “Euro 2024” që mbahet në Gjermani.
Finalja e madhe Partizani – Egnatia, do të luhet të dielën në stadiumin “Air Albania” në Tiranë prej orës 19:00. Gjyqtar i katërt në këtë ndeshje do të jetë Enea Jorgji, ndërsa Kreshnik Bajramaj do të jetë asistent në VAR.
