Nuk është hera e parë që vjen në gjykatore.
Ulësen e dëshmitarit, Sulejman Mustafa e ka provar disa herë.
Ai është dëshmitar në radhët e Prokurorisë Speciale, kundër Slagjan Trajkoviq
Paralel me të, erdhën edhe disa familjarë të Trajkoviq.
Mirëpo, ato se çfarë ka për të thënë Mustafa kundër Trajkoviq, nuk u dëgjuan as të mërkurën.
“Zotëri gjykatës, unë s’e di a muj mo me ardhë”, tha dwshmitari.
Kjo ndodhi për shkak se mbrojtja e të akuzuarit, u ankua se nuk e ka në posedim deklaratën e dëshmitarit në polici, të përkthyer në gjuhën serbe.
“Ne kemi pranuar deklaratën e dëshmitarit në polici, por e njëjta rezulton se është e papërkthyer në gjuhën serbe. Po ashtu, nuk e kam as procesverbalin e identifikimit”, tha Bogdan Lazoviç, avokat i të akuzuarit.
Mirëpo, Prokuroria Speciale pati një kundërshtim.
“Asnjëherë, avokati që ka qenë i autorizuar, Dejan Vasiq, nuk e ka ngritë këtë çështje se mungon deklarata e Sulejman Mustafës e përkthyer në gjuhën serbe… Por, jam shumë e sigurt që kjo deklaratë është e përkthyer edhe në gjuhën serbe dhe e ka pranu avokati”, tha Florije Salihu – Shamolli – prokurore special.
Në këtë situatë, trupi gjykues ofroi dy mundësi për mbrojtjen që ta ketë sa më shpejt mbrojtja këtë shkresë.
“Ne përmes përkthyesit që është prezent, mund t’ua lexojmë deklaratën e dëshmitarit në polici në gjuhën serbe, me qëllim që të vazhdohet me marrjen në pyetje. Po ashtu, edhe mund ta përkthejmë për nëj periudhë kohore prej dy orësh”, u shpreh Ngadhnjim Arrni – kryetar i trupit gjykues.
Por, me asnjërën prej mundësive nuk u pajtua mbrojtja, e cila kërkoi që ky dëshmitar të dëgjohet në një seancë tjetër.
Rrjedhimisht, dëgjimi i Mustafës u shtye.
Trajkoviq, akuzohet se në bashkëkryerje me pjesëtarë tjerë të panjohur të njësisë së Policisë Serbe në fshatrat përreth të komunës së Vushtrrisë, ka marrë pjesë në vrasje, bastisje, rrahje, arrestime, trajtim ç’njerëzor, plaçkitje e djegie të shtëpive të popullsisë civile shqiptare.
