Gjykimi në rastin e Pjetër Shalës pranë Dhomave të Specializuara të Kosovës në Hagë ka prekur fundin.
Ky proces gjyqësor që kishte filluar në shkurt të vitit të kaluar do të marrë të martën epilog kur edhe do të bëhet shpallja e aktgjykimit.
Amer Alija nga Fondi për të Drejtën Humanitare ka thënë se ky gjykim është karakterizuar me redaktime të shumta gjatë dëgjimit të dëshmitarëve.
“Në përgjithësi janë mbajtur 43 seanca dhe janë dëgjuar 22 dëshmitar të propozuar nga prokuroria, mbrojtja dhe dy dëshmitar nga pala e dëmtuar. Gjykimi si edhe në gjykimet e tjera ka pasë mjaftë redaktime sa i përket dëgjimit të dëshmitarëve”, Amer Alija – Fondi për të Drejtën Humanitare.
Në anën tjetër, në po të njëjtën gjykatë është duke vazhduar procesi gjyqësor në rastin e ish-krerëve të Ushtrisë Çlirimtare të Kosovës.
Por pas dy jave Gjykata Speciale do të shkojë në pushim të verës deri më 16 gusht.
Punën e këtij organi në rastin e katërshes së UÇK-së deri në këtë muaj e sheh me plotë kritika, avokati, Artan Qerkini.
Megjithatë ai shpreson se që nga tetori e tutje do të ketë ndryshime.
“Dështimi i gjykatës konsiston në faktin se i ka pranuar të gjitha provat e prokurorisë që të administrohen dhe numri i madh i tyre po e zvarrit procedurën, pra problemi nuk është të aktivizmi i gjykatës por numri i madh i provave të panevojshme, shpresoj që në muajin tetor kur prokuroria do ti prezantojë gjykatës edhe shkurtime të tjera në prova besoj që procedura do të zhvillohet me një tempo edhe më të shpejtë”, shprehet avokati Artan Qerkimi
Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill të atij viti.
Sipas aktakuzës, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur.
