Daut Elshani asnjëherë nuk rreshti së kërkuari drejtësi.
As pas dy dekadave, edhe pse në moshë të shtyrë, shpresa që drejtësia të vihet në vend për tre djemtë e vrarë në masakrën e Saradranit e mbanë disi në këmbë.
Me bastunin e tij, erdhi pothuajse në të gjitha seancat ku ish-polici Ekrem Bajorviq akuzohet se ka kryer krime lufte kundër popullsisë civile në Istog.
Ai këtu i kërkoi llogari Bajroviqit për vrasjen e djemve dhe vëllait.
Për akuzat për krime lufte ndaj popullësisë civile është duke u zhvilluar edhe një proces tjetër.
Muhamet Alidemaj, po akuzohet se ka marrë pjesë në masakrën e Izbicës.
Edhe për këtë rast dëshmitarët kërkuan drejtësi për familjarët.
Këto dy raste janë duke shkuar drejtë fundit, pasi gjatë kësaj javë dhe tjetrës, palët do t’i thonë fjalët e tyre përfundimtare.
Në rastin e Ekrem Bajroviqit kanë dëshmuar 20 dëshmitar të Prokurorisë.
“Rasti kundër EkremBajrovic ka shkuar procedura më shpejtë sepse fjalët hyrëse kanë filluar në dhjetor të vitit 2023 dhe tani në korrik të vitit 2024 do të kemi vendimin e shkallës së parë”, ka thënë Amer Alija nga Fondi për të Drejtat Humanitare.
Jo aq shpejtë sa rasti i Bajroviq ka shkuar edhe rasti i Alidemaj, ku kanë dëshmuar rreth 21 dëshmitarë.
“Seancat janë caktuar më rrallë varësisht prej kalendarit apo se si kanë qenë të lirë palët, po ashtu edhe në fund të vitit 2023 një anëtarë e trupit gjykues është caktuar si mbikëqyrëse në gjykatën e Fushë Kosovës dhe këtu janë humbur disa muaj derisa është caktuar një anëtar i ri i trupit gjykues”, thotë ai.
As Bajroviq e as Alidemaj nuk i kanë pranuar akuzat për të cilat ngarkohen, madje ky i fundit në njërën prej seancave kishte thënë se i vjen keq për atë që i kishte ndodhur popullit shqiptar.
