Edhe pak ditë kanë mbetur kur kompanitë të cilat kanë më shumë se 50 punëtorë do të pranojnë faturat e energjisë elektrike me çmime shumëfish më të larta.
Kjo pasi këtë muaj, ato do të paguajnë rrymën me çmim jo të rregulluar, e gjithë kjo sipas vendimit të Zyrës së Rregullatorit të Energjisë për liberalizim të tregut.
Por ky vendim ka filluar të pezullohet nga Gjykata Komerciale për kompanitë që kanë dorëzuar padi.
Madje të mërkurën, Oda Ekonomike njoftoi që kjo Gjykatë vendosi që të bëhet pezullim edhe për kompaninë e dytë.
E në pritje të përgjigjes janë edhe disa kompani të tjera.
“Në referim të kërkesës tuaj, ju njoftoj se lidhur me këtë çështje, Gjykata Komerciale e Kosovës, përkatësisht Departamenti për Çështje Administrative, ka të evidentuara dhjetë (10) lëndë të kësaj natyre. Gjykata deri në këto momente ka vendosur në katër (4) raste, megjithatë nuk mund të konfirmojmë për media mënyrën e vendosjes, deri në pranimin e dëshmisë / fletëkthesës për pranimin e vendimeve nga ana e palëve në procedurë”.
Por nga ZRRE, një ditë më parë deklaruan se aktgjykimi për një rast nuk do të thotë edhe pezullim të vendimit.
Kështu nga Oda Ekonomike kanë kërkuar që ky institucion të jetë më profesional.
“Si është e mundur tani që biznese që e ka një aktvendim të gjykatës me qëndru me çmim të rregulluar ndërsa biznesi që është në pritje të vendimit të Gjykatës me qëndrua në tregun e lirë dhe me dëmtu kur ne e prodhojmë të njëjtin produkt. Atëherë ti si ZRRE po shkakton jo konkurrencë po, shkatërron ekonominë e vendit”, ka thënë Lulëzim Rafuna.
Sipas avokatit, Qëndrim Arifi, Zyra e Rregullatorit ka të drejtë juridikisht, pasi masa e përkohshme nuk e pezullon tërësi liberalizmin e tregut të energjisë.
Megjithatë, Arifi thotë se ZRRE duhet ta shqyrtojë një gjë të tillë.
“ZRRE-ja duhet ta trajtoj këtë në aspekt se në rregull nuk më obligon mirëpo diçka nuk është në rregull me vendimin që e kam marrë sepse në fund është institucioni publik dhe isha dashur të punoj në interes të gjithë qytetarëve. Edhe Gjykata Komerciale duhet ta trajtojë këtë çështje sepse një lëshim profesional mund të ndikoj nesër që të bllokohet i tërë sistemi me qindra ose mijëra padi nga subjekt dhe çështja është njëjtë”, thotë Arifi.
Oda Ekonomike e Kosovës dhe përfaqësues të tjerë të sektorit privat kanë kërkuar nga Qeveria e Kosovës që të subvencionojë sektorin privat. Në një letër drejtuar kryeministrit në detyrë, Albin Kurti, Oda Ekonomike ka bërë thirrje që Kosova të marrë veprime konkrete në kohën kur parashikohet shtrenjtim i mëtejmë i energjisë.
Nga Oda Ekonomike kanë thënë se të gjitha bizneset do të paraqesin padi në Komerciale, madje pas marrjes së faturave të para do të bëjnë edhe padi për kompensim të dëmit.
Gjithashtu kanë paralajmëruar protestën e radhës, nëse siç thanë ata, s’do të ketë reagim nga Qeveria apo nga Zyra e Rregullatorit.
