Departamenti për Krime të Rënda ka miratuar kërkesën e mbrojtjes së të akuzuarit Naim Murseli për realizimin e një ekzaminimi psikiatrik ndaj tij.
Sipas konfirmimit zyrtar nga gjykata për Tëvë1, më 4 qershor 2025 është aprovuar kërkesa e parashtruar nga avokatja e Murselit, ndërsa më 9 qershor trupi gjykues ka lëshuar urdhëresë që Instituti i Psikiatrisë Forenzike në Prishtinë të kryejë ekzaminimin e gjendjes mendore të të akuzuarit.
“Me datë 09.06.2025 trupi gjykues në këtë çështje penale ka lëshuar Urdhëresë përmes së cilës është urdhëruar Instituti i Psikiatrisë Forenzike në Prishtinë të bëjë ekzaminimin psikiatrik për të akuzuarin N.M.”, thuhet në përgjigjen zyrtare të gjykatës.
Ky veprim vjen si pjesë e procedurave të mbrojtjes, e cila ka pretenduar se Murseli ka shfaqur sjellje të paqëndrueshme dhe nevojë për vlerësim të gjendjes së tij mendore. Ekzaminimi pritet të ndihmojë në përcaktimin e përgjegjësisë penale të tij për rastin që ka tronditur opinionin publik — vrasjen e bashkëshortes së tij, Liridona Ademaj.
