Gjykata Supreme hodhi poshtë të hënën një thirrje për të përmbysur vendimin e saj historik që legalizoi martesën e personave të të njëjtit seks në të gjithë vendin.
Gjyqtarët, pa koment, hodhën poshtë një apel nga Kim Davis , ish-sekretarja e gjykatës së Kentucky-t, e cila refuzoi të lëshonte licenca martese për çiftet e të njëjtit seks pas vendimit të gjykatës së lartë të vitit 2015 në çështjen Obergefell kundër Hodges.
Davis ishte përpjekur që gjykata të rrëzonte një urdhër të gjykatës së shkallës së parë që ajo të paguante 360,000 dollarë dëmshpërblim dhe tarifa avokati për një çift të cilit i ishte mohuar leja e martesës.
Avokatët e saj përmendën vazhdimisht fjalët e gjyqtarit Clarence Thomas, i cili i vetmi midis nëntë gjyqtarëve ka bërë thirrje për fshirjen e vendimit për martesën e të njëjtit seks, shkruan Guardian.
Thomas ishte midis katër gjyqtarëve që kundërshtuan vendimin në vitin 2015. Kryetari i Gjykatës së Lartë John Roberts dhe gjyqtari Samuel Alito janë disidentët e tjerë që janë në gjykatë sot.
Roberts ka heshtur për këtë temë që kur shkroi një mendim mospajtues në këtë çështje. Alito ka vazhduar ta kritikojë vendimin, por kohët e fundit tha se nuk po mbron që ai të përmbyset.
Gjyqtarja Amy Coney Barrett, e cila nuk ishte në gjykatë në vitin 2015, ka thënë se ka raste kur gjykata duhet të korrigjojë gabimet dhe të përmbysë vendimet, siç bëri në rastin e vitit 2022 që i dha fund të drejtës kushtetuese për abort.
Por Barrett ka sugjeruar kohët e fundit se martesa e personave të të njëjtit seks mund të jetë në një kategori të ndryshme nga aborti, sepse njerëzit janë mbështetur në vendimin e marrë kur janë martuar dhe kanë pasur fëmijë.
