Në paraburgim janë që nga 5 nëntori i vitit 2020. Për akuzat për krime lufte e krime kundër njerëzimit ndaj Thaçit, Veselit, Krasniqit e Selimit, Zyra e Prokurorit të Specializuar, ende nuk i ka mbyllur hetimet e saj.
E të arriturën më të madhe të kësaj faze paragjyësore, Specialja e konsideron dosjen paraprake të ZPS-së, e cila është tërësisht konfidenciale.
“Kohëzgjatja e procedurës lidhet me kompleksitetin e një rasti të caktuar. Në rastin e z.Thaçi dhe të bashkëakuzuarve të tij, në këtë fazë është e pamundur të thuhet se kur saktësisht do të fillojë gjykimi. Prokuroria ka depozituar dosjen e saj paraprake më 17 dhjetor 2021, e cila është një moment historik i rëndësishëm në përgatitjen e gjykimit”, thuhet në përgjigjen Dhomave të Specializuara të Kosovës.
Që këto procedura të fillojnë brenda këtij viti, si vështirë të realizueshme e konsideron avokati, Skender Musa.
E përgjegjësinë se kur rasti i ish-presidentit Thaçi do t’i kalojë trupit gjykues, Dhomat e Specializuara ia lanë gjykatësit të procedurës paraprake.
“Tashmë i takon gjyqtarit të procedurës paraprake që, bazuar në argumentet e palëve, të vendosë se kur Mbrojtja duhet të paraqes dosjen e tyre paraprake dhe kur të përfundojnë përgatitjet e tjera të nevojshme për gjykim. Më pas, gjyqtari e procedurës paraprake do ta njoftojë kryetaren se është i gatshëm të transferojë dosjen e lëndës dhe ajo do të caktojë një trup gjykues”, thuhet në përgjigjen Dhomave të Specializuara të Kosovës.
Ekipet mbrojtëse të katër ish krerëve të UÇK-së, kanë kundërshtuar aktakuzën dhe juridiksionin e Gjykatës Speciale për t’i gjykuar krimet e pretenduara, por të cilat u refuzuan.
Raporti i gazetares Florijeta Dernjani.
