Gjykata Themelore në Prishtinë ka vendosur të mos e aprovojë kërkesën e Prokurorisë Speciale për caktimin e paraburgimit ndaj shtatë personave të dyshuar për përfshirje në vepra penale të korrupsionit.
Sipas njoftimit të gjykatës, Departamenti Special ka shqyrtuar rastin ndaj të dyshuarve me inicialet N.K., N.R., Sh.S., H.M., H.M., V.G. dhe A.P., të cilët po hetohen për veprat penale marrje ryshfeti, keqpërdorim të pozitës apo autoritetit zyrtar, dhënie ryshfeti dhe ndihmë në kryerjen e veprës penale të dhënies së ryshfetit.
Pas mbajtjes së seancës dëgjimore dhe shqyrtimit të kërkesës së prokurorisë, gjyqtari i procedurës paraprake ka vendosur që ndaj të pandehurve të shqiptohet masa e arrestit shtëpiak në kohëzgjatje prej një muaji.
Masa do të jetë në fuqi nga 6 maji deri më 5 qershor 2026, ndërsa të dyshuarit nuk do të kenë të drejtë të largohen nga vendbanimet e tyre pa lejen e gjykatës.
Në vendim thuhet se çdo shkelje e masës së arrestit shtëpiak mund të rezultojë me caktimin e paraburgimit.
Palët e përfshira në procedurë kanë të drejtë ankese në Gjykatën e Apelit përmes Gjykatës Themelore në Prishtinë.
