Nën masa të rrepta sigurie, erdhi në veri të Mitrovicës, Kaja Kallas. Kështu e nisi ditën e premte, përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas.
Bashkë me të ishte edhe emisari i BE-së për dialogun Kosovë – Serbi, Peter Sorensen.
Dyshja pas arritën në Gjykatën Themelore të Mitrovicës së Veriut, aty u pritën nga kryetari i Këshillit Gjyqësor të Kosovës, Albert Zogaj.
Se çfarë u diskutua në takim, tregoi vetë Kallas.
“Gjykata është duke funksionuar për kthimin e gjyqtarëve serbë. Në takim me kryetarin e KGJK-së kemi diskutuar për këtë temë. Jam këtu në vizitë, për mua është e rëndësishme te flas me komunitetin ndërkombëtar, dhe ata lokal se si e shohin situatën në veri të vendit, që të informohemi në mënyrë te duhur”, tha Kallas.
E pyetur për situatën në katër komunat veriore, diplomatja e bllokut evropian, tha se duhet të mirren opioninet e të dyja palëve, si nga Kosova ashtu edhe Serbia.
“Mendoj se këto janë informacione jashtëzakonisht të rëndësishme për mua që ta kuptoj më mirë situatën, sepse shohim që njëra palë thotë një gjë dhe pala tjetër thotë diçka tjetër. Por mendoj se forcat ndërkombëtare që janë këtu po japin një pasqyrë mjaft të saktë dhe është gjithashtu e rëndësishme të flasim me njerëzit në vend. Dhe më pas mund të shohim se çfarë mund të bëjmë më shumë në mënyrë që e ardhmja të jetë e begatë, e sigurt dhe e qetë për të gjithë në Kosovë”, është shprehur Kallas.
Kallas erdhi në Kosovë një ditë më parë, dhe pas vizitës në veri të vendit, ajo vazhdoi për në Maqedoni të Veriut, ku do të takohet me kryeminstrin maqedonas, Hristjan Mickoski.
