Gjykata Kushtetuese e Republikës së Kosovës ka reaguar lidhur me kërkesën e Presidentes Vjosa Osmani të datës 5 gusht 2025 për tërheqjen e lëndës KO215/25, e parashtruar më 22 korrik 2025.
Në një njoftim zyrtar drejtuar mediave dhe opinionit publik, Gjykata Kushtetuese ka sqaruar se vepron në përputhje të plotë me Kushtetutën, Ligjin për Gjykatën Kushtetuese dhe rregulloren e saj të punës. Ajo thekson se çdo kërkesë e dorëzuar nga palët e autorizuara trajtohet me përpikëri, duke respektuar procedurat e brendshme dhe parimet e paanshmërisë dhe profesionalizmit.
“Ndarja e lëndëve për shqyrtim tek gjyqtarët raportues dhe kolegjet shqyrtuese në Gjykatën Kushtetuese bëhet në bazë të rregullave të qarta procedurale, të cilat kjo Gjykatë i respekton me përpikëri. Vendimet merren në përbërje të plotë”, thuhet në njoftim.
Sa i përket gjyqtarit Radomir Laban, për të cilin janë ngritur pikëpyetje në opinion, Gjykata ka sqaruar se ai është pjesë e saj që nga viti 2011 si këshilltar juridik dhe, që nga 9 gushti i vitit 2018, ushtron funksionin e gjyqtarit, pasi ka kaluar të gjitha procedurat kushtetuese dhe ligjore për emërimin e tij.
Gjykata gjithashtu ka rikujtuar se procedurat për shkarkimin e gjyqtarëve janë të përcaktuara qartë në Kushtetutën e Republikës së Kosovës.
“Gjykata Kushtetuese, si autoriteti përfundimtar për interpretimin e Kushtetutës, trajton të gjitha kërkesat e dorëzuara nga palët e autorizuara me paanshmëri, përkushtim dhe profesionalizëm”, përfundon njoftimi.
