Mjetet e rënda janë të parkuara.
Tash e disa muaj nuk është punuar me to.
Por së shpejti këto mjete do të vihen në funksion.
Pas tre muaj te pezullimit te punës, vendimi i shkalles se dyte te Gjykatës Komerciale do lejoje vazhdimin punimeve ne rrugën Xhim Xhem te njohur si rruga A
Në vendimin e Gjykatës Komerciale thuhet se janë aprovuar si të bazuara ankesat e Organit Shqyrtues të Prokurimit me seli në Prishtinë, dhe palëve të interesuara Komuna e Prishtinës si dhe operatorit ekonomik “Sallahu”.
Kolegji i Gjykatës Komerciale ka vlerësuar se pikërisht shtyrja e vendimit jo vetëm se është në kundërshtim me interesin publik, por rrezikon që të dëmtojë më shumë palët e përfshira në raport me paditësin.
“Bazuar në vlerësimin e Kolegjit, gjykata e shkallës së parë nuk ka arritur që të përcaktojë drejtë interesin publik, i cili në rastin konkret është i kufizuar në interesin për të vazhduar ose jo projektin që është objekt i procedurës së prokurimit, në raport me kërkesat e paditësit. Shqyrtimi i fakteve të tjera, siç është në rastin konkret buxheti, e tejkalon fushëveprimin e objektit të shqyrtimit dhe bie ndesh me kushtin tjetër që ndërlidhet me ‘dëmin e pariparueshëm’, thuhet në vendimin e Gjykatës.
Televizioni ka provuar të marrë një prononcim nga Komuna e Prishtinës për këtë çështje, por ata nuk kanë kthyer përgjigje.
E vendimin e Gjykatës Komerciale, nuk e kanë komentuar as partia opozitare në Komunën e Prishtinës, Lëvizja Vetëvendosje.
Pezullimin e punës në rrugën A, nga Gjykata Komerciale, kryetari i Prishtinës, e patë quajtur vendim politik.
Ndryshe në prill të vitit 2023, kishte filluar ndërtimi i fazës së parë të Rrugës A, e cila ishte planifikuar të ndërtohej për 240 ditë dhe e cila do të kushtonte 8.4 milionë euro.
