Një gjykatë federale në Nju Jork i dha një goditje të rëndë Presidentit amerikan, Donald Trump të mërkurën, duke ndaluar planin e tij ambicioz për të vendosur taksa masive mbi importet nga pothuajse çdo vend në botë.
Një panel prej tre gjyqtarësh të Gjykatës Amerikane të Tregtisë Ndërkombëtare vendosi se Trump kishte tejkaluar autoritetin e tij kur përdori Aktin Ndërkombëtar të Fuqive Ekonomike të Emergjencës të vitit 1977 (IEEPA) për të shpallur një emergjencë kombëtare dhe për të justifikuar tarifat gjithëpërfshirëse.
Këto tarifa, të cilat shënuan një kthesë drastike në politikën tregtare të SHBA-së, ndërprenë rrjedhën normale të tregtisë globale, tronditën tregjet financiare dhe rritën rrezikun për çmime më të larta dhe recesion ekonomik brenda dhe jashtë vendit.
Gjykata Amerikane e Tregtisë Ndërkombëtare ka juridiksion mbi çështjet civile që lidhen me tregtinë ndërkombëtare.
Vendimet e saj mund të apelohen në Gjykatën e Apelit të SHBA-së për Qarkun Federal në Uashington dhe më pas në Gjykatën Supreme, ku pritet të përfundojnë sfidat ligjore ndaj tarifave të vendosura nga Trump.
Ky vendim ndalon tarifat që Trump vendosi muajin e kaluar ndaj pothuajse të gjithë partnerëve tregtarë të SHBA-së, si dhe taksat që ai kishte vendosur më parë ndaj Kinës, Meksikës dhe Kanadasë, raporton AP.
Gjykata tregtare vuri në dukje se Trump mban një fuqi më të kufizuar për të vendosur tarifa për të adresuar deficitet tregtare sipas një statuti tjetër, Aktit të Tregtisë të vitit 1974. Por ky ligj i kufizon tarifat në 15% dhe vetëm për 150 ditë me vendet me të cilat Shtetet e Bashkuara kanë deficite të mëdha tregtare.
Më 2 prill, Trump kishte shpallur tarifa reciproke deri në 50% për vendet me të cilat SHBA-ja ka deficit tregtar, dhe tarifa bazë prej 10% për pothuajse të gjithë të tjerët.
Më vonë, ai pezullonte tarifat reciproke për 90 ditë, duke i dhënë vendeve kohë për të negociuar uljen e barrierave ndaj eksporteve amerikane, por mbajti në fuqi tarifat bazë.
Ai pretendoi se kishte fuqinë e jashtëzakonshme për të vepruar pa miratimin e Kongresit, duke shpallur deficitin tregtar një “emergjencë kombëtare” sipas IEEPA-s.
