Të mërkurën, Kosova kaloi fazën e parë drejt anëtarësimit në Këshillin e Evropës.
Me anëtarësimin e plotë, Gjykata Evropiane për të Drejtat e Njeriut do të jetë një derë e re në aspektin e drejtësisë për kosovarët.
E kjo po vlerësohet se do të ndikojë pozitivisht dhe se qytetarët e Kosovës do të kenë përfitime nga kjo Gjykatë.
Gëzim Shala nga Instituti Kosovar për Drejtësi tregon se kjo do të ishte shumë e rëndësishme për shkak se rritë mbrojtjen e të drejtave të njeriut.
Derisa shton se do të ndikojë edhe në sistemin gjyqësor të vendit.
“Definitivisht se kjo do të ishte shumë e rëndësishme për rritjen e mbrojtjes së këtyre të drejtave duke marrë parasysh se mbrojtja në këtë rast do të ishte një mbrojtje edhe përtej mekanizmave të brendshëm për t’iu drejtuar Gjykatës Evropiane. Përtej rasteve individuale praktika e vendosur dhe mënyra e vendimmarrjes në Gjykatën Evropiane do të mund të ndërtonte edhe standard adekuat në rendin juridik të Republikës së Kosovës lidhur me të drejtat e njeriut dhe lirive themelore”, ka deklaruar ai.
E këtë po e sheh si të domosdoshme edhe avokati, Nasuf Hasani.
Ai përmend se kjo Gjykatë Ndërkombëtare do të ndikojë edhe në uljen e kohëzgjatjes së proceseve gjyqësore.
“Unë besoj se edhe ka kompetencë kjo Gjykatë ta bëj një vlerësim dhe rrjedhimisht dhe me vendim e konstaton gjendjen faktike. Përderisa me të drejtën pozitive përkufizohet se një kontest duhet të trajtohet me kohë të arsyeshme atëherë si mund ta vlerësojmë kohë të arsyeshme kur një kontest pronësor vetëm në Gjykatën Themelore për tu trajtuar ose vendosur kalojnë 10 vite kohë. Unë besoj po e ritheksoj se ka me pas efekte jashtëzakonisht të mira në punën e gjykatave tona”, ka thënë avokati, Nasuf Hasani.
Kjo Gjykatë që selinë e ka në Strasburg, konsiderohet si një prej mjeteve juridike më efektive në gjithë Evropën.
Ajo bën monitorimin e zbatimit të Konventës Evropiane për të Drejta të Njeriut, të cilën e nënshkruan një vend anëtarë pas anëtarësimit në këtë insitucion.
