Gjykata Themelore në Prishtinë, Departamenti Special, ka shpallur aktgjykim ndaj zëdhënësit të Qeverisë, Arlind Manxhuka, dhe deputetit të Lëvizjes Vetëvendosje, Egzon Azemi, të akuzuar për veprën penale “Nxitja e përçarjes dhe mosdurimit”.
Sipas njoftimit të gjykatës, të dy të akuzuarit janë shpallur fajtorë dhe janë dënuar secili me burgim prej 1 viti e 6 muajsh.
“Të akuzuarit Arlind Manxhuka dhe Egzon Azemi janë shpallë fajtor dhe janë dënuar secili me dënim me burgim në kohëzgjatje prej 1 (një) viti e 6 (gjashtë) muajsh, për veprën penale Nxitja e përçarjes dhe mosdurimit”, thuhet në njoftim.
Gjykata ka shpallur fajtorë edhe të akuzuarit Q.E. dhe E.Z. për veprën penale “Kanosja”, duke i dënuar me nga 6 muaj burgim secilin.
“Të akuzuarit Q.E. dhe E.Z. janë shpallë fajtor dhe janë dënuar secili me dënim me burgim në kohëzgjatje prej 6 (gjashtë) muajsh, për veprën penale Kanosja”, thuhet më tej.
Sipas aktgjykimit, dënimi do të ekzekutohet 15 ditë pas plotfuqishmërisë së vendimit.
Po ashtu, të dënuarit obligohen të paguajnë nga 200 euro për shpenzimet e procedurës penale dhe nga 100 euro për kompensimin e viktimave të krimit.
“Të dëmtuarit janë udhëzuar në kontest të rregullt juridiko-civil, për realizimin e kërkesës pasurore-juridike”, thuhet në njoftim.
Palët kanë të drejtë ankese në Gjykatën e Apelit të Kosovës brenda 30 ditësh nga pranimi i aktgjykimit.
