Kjo meqë edhe J.R po dyshohet se mori pjesë në krime lufte kundër popullsisë civile në Kosovë.
E një ditë më pas, serbi nga Zubin Potoku, e gjeti vetën në gjykatore.
Kështu në ora 14:00 të mesditës së të hënës, J.R u fut në gjykatë nga hyrja larg syrit të medieve.
Në seancën që zgjati afër dy orë, prokurori special kërkoi që ndaj të dyshuarit të caktohet masa e paraburgimit prej 1 muaji.
E në orët e pasdites, kërkesa e PSRK-së u aprovua nga gjykata.
“Pas mbajtjes së seancës dëgjimore, gjyqtarja e procedurës paraprake ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit ndaj të pandehurit J.R., duke caktuar masën e paraburgimit në kohëzgjatje prej 1 (një) muaji”, thuhet tutje ne njoftimin e Gjykatë Themelore në Prishtinë.
Këtë vendim, Departamenti Special brenda Themelores, e arsyetoi në këtë mënyrë.
“Gjykata vlerësoj se caktimi i masës së paraburgimit në këtë çështje penale është masë adekuate, pasi ekziston rrezik real që nëse i pandehuri lihet në liri, mund të arratiset me qëllim të fshehjes dhe ikjes nga përgjegjësia penale, po ashtu i njëjti është edhe shtetas i Serbisë, andaj ekziston rreziku real që të arratiset lehtë dhe të jetë i pa arritshëm për organet e drejtësisë, me çka do të pamundësohet sigurimi i prezencës së tij dhe do të pengohej rrjedha normale e procedurës penale”, thuhet tutje në njoftimin e Gjykatës Themelore në Prishtinë.
Tutje, në vendimin e gjykatës u tha se nëse i pandehuri lihet në liri, ekziston rreziku që i njëjti të ndikojë në prova dhe në dëshmitarë.
Ndryshe, J.R është serbi i tretë i arrestuar brenda pak ditësh në Zubin Potok, për veprën penale “Krime lufte kundër popullsisë civile”.
Në fshatrat e kësaj komune me shumice serbe, së fundmi u identifikuan dy varreza masive me mbetje mortore të shqiptarëve të vrarë në luftën e fundit në Kosovë.
