Një muaj paraburgim i është caktuar të dyshuarit A.P. nga Gjykata Themelore në Prishtinë, nën dyshimin për kryerjen e veprës penale “Vrasje e rëndë” ndaj viktimës i njohur me nofkën “Radulla”.
Vendimi është marrë nga Departamenti për Krime të Rënda, pas kërkesës së Prokurorisë Themelore në Prishtinë për shqiptimin e masës së sigurisë ndaj të dyshuarit.
Sipas Gjykatës, pas shqyrtimit të rrethanave të rastit në seancën dëgjimore, është vlerësuar se ekziston rreziku që i pandehuri të largohet nga vendi për t’iu shmangur procedurës penale.
Po ashtu, në arsyetimin e aktvendimit thuhet se paraburgimi është konsideruar i domosdoshëm edhe për shkak të mundësisë që i dyshuari të ndikojë në hetime, përmes manipulimit apo fshehjes së provave, si dhe ndikimit tek dëshmitarët.
Masa e paraburgimit do të zgjasë 30 ditë, ndërsa palët kanë të drejtë ankese ndaj këtij vendimi në Gjykatën e Apelit, përmes Gjykatës Themelore në Prishtinë.
