Presidentja e Kosovës, Vjosa Osmani, ka deklaruar se ish-presidenti amerikan Donald Trump ka parandaluar disa konflikte, përfshirë edhe një përpjekje të Serbisë në muajin maj për të shkaktuar tensione në Kosovë.
“Presidenti Trump ka parandaluar disa konflikte dhe një gjë të tillë e bëri edhe në rastin e Kosovës, ku në muajin maj ka pasur një përpjekje nga Serbia, por që është parandaluar”, ka thënë Osmani në një intervistë për Fox News.
Menjëherë pas këtyre deklaratave, ministri i Jashtëm i Serbisë, Marko Gjuriq, ka reaguar ashpër duke i cilësuar ato si “pretendime të rreme”.
“Vjosa Osmani e përdori intervistën e saj në Fox News këtë mëngjes për të përhapur një sërë gënjeshtrash në një përpjekje për ta portretizuar qeverinë e saj si diçka që thjesht nuk është. Ajo pretendoi në mënyrë të rreme se Serbia ka planifikuar ndonjëherë një ‘sulm’ ose ndonjë formë agresioni”, ka shkruar Gjuriq në platformën X.
Gjuriq ka theksuar se akuzat e Osmanit janë hedhur poshtë edhe nga ish-emisari amerikan për dialogun, Richard Grenell.
“Kjo akuzë është hedhur poshtë tashmë publikisht – përfshirë edhe nga Ambasadori Richard Grenell, një nga aleatët më të ngushtë të Donald Trump. Pretendime të tilla tregojnë se Osmani qëndron në kundërshtim me politikat e Presidentit Trump dhe të Shteteve të Bashkuara që ajo pretendon se i përqafon”, ka shtuar ai.
Ministri serb ka përmendur edhe pezullimin e dialogut strategjik midis SHBA-së dhe Kosovës, duke thënë se Osmani “harroi” ta përmendte këtë detaj.
“Pikërisht për këtë arsye administrata amerikane e udhëhequr nga Presidenti Trump ka pezulluar për një kohë të pacaktuar dialogun strategjik midis SHBA-së dhe ‘Kosovës’. Një detaj i vogël që ajo ‘harroi’ ta përmendte”, ka shkruar Gjuriq.
Në fund, ai ka akuzuar Qeverinë e Kosovës se ka qenë hapur kundër politikave të Trumpit.
“E ashtuquajtura ‘qeveri e Kosovës’ në fakt ka qenë qeveria më e hapur anti-Trump në Evropë – duke vepruar jo vetëm kundër politikës amerikane, por edhe kundër vetë vlerave që përfaqëson Evropa. Dhe ideja e qeverisë së saj për të ‘mbështetur’ Presidentin Trump? Pjesëmarrja në Konventën Demokratike në mes të një fushate zgjedhore në SHBA. Nëse ky nuk është një shembull tipik i ndërhyrjes së huaj dhe dyfytyrësisë politike, është e vështirë të imagjinohet se çfarë është”, ka përfunduar Gjuriq.
