Ministri i Jashtëm i Serbisë, Marko Gjuriq, ka akuzuar kryeministrin në detyrë të Kosovës, Albin Kurti, për udhëheqjen e një politike që, sipas tij, synon dëbimin e serbëve nga Kosova dhe shkatërrimin e trashëgimisë së paqes të arritur gjatë mandatit të parë të presidentit amerikan, Donald Trump.
Në fjalimin e tij para Këshillit të Sigurimit të Kombeve të Bashkuara, ku u diskutua raporti i Sekretarit të Përgjithshëm të OKB-së, Antonio Guterres, për zhvillimet në Kosovë, Gjuriq deklaroi se “komuniteti serb në Kosovë po përballet me një gërryerje sistematike dhe një betejë humane për mbijetesë”.
“Ka arrestime arbitrare, dhunë të pakontrolluar dhe një sfidë të drejtpërdrejtë ndaj parimeve themelore të Kombeve të Bashkuara,” tha ai, duke theksuar se raporti i Guterresit “pasqyron tmerret e përditshme që po përjetohen atje”.
Sipas Gjuriqit, autoritetet kosovare kanë shkatërruar 128 institucione jetike në zonat me shumicë serbe, përfshirë shërbimet sociale, postën, pensionet dhe punësimin.
“Madje edhe Kryqi i Kuq është bërë shënjestër,” theksoi ai.
Ai pretendoi se qeveria e Kosovës ka vazhduar të mbyllë institucionet e udhëhequra nga Serbia, duke shtuar se këto veprime janë kritikuar edhe nga faktorët ndërkombëtarë.
Ministri serb foli gjithashtu për, siç i quajti, “sulmet e shpeshta me motive etnike”, duke pretenduar se mbi 30 të rinj serbë janë shënjestruar që nga ardhja në pushtet e Kurtit.
“Nëse je serb, askush nuk të mbron. Ky mohim sistematik i të drejtave themelore është një dështim i thellë moral dhe politik,” deklaroi Gjuriq.
Ai akuzoi Qeverinë e Kosovës për militarizim të vendit dhe blerje të dronëve kamikazë.
“Paqja nuk ndërtohet me armatim të njërës palë,” tha ai.
Gjuriq ngriti shqetësime edhe për, sipas tij, gjendjen e rënduar të Kishës Ortodokse Serbe në Kosovë.
“Sulmet ndaj objekteve fetare janë një erozion i qëllimshëm i identitetit kulturor,” tha ai.
Sipas tij, rreth 20 për qind e serbëve janë larguar nga Kosova në një “eksod të heshtur”, ndërsa vetëm 17 kthime vullnetare janë regjistruar.
“A është kjo shoqëria multietnike që po proklamohet?”, pyeti ai retorikisht.
Thirrje për formimin e Asociacionit të Komunave Serbe
Në fund të fjalës së tij, Gjuriq i bëri thirrje autoriteteve të Kosovës që të formojnë Asociacionin e Komunave me Shumicë Serbe.
“Kjo nuk është kërkesë e Serbisë, por zotim i dhënë nga vetë Kosova,” deklaroi ai, duke akuzuar Kurtin për sabotim të procesit.
“Kurti po dëmton marrëveshjet dhe trashëgiminë e paqes të presidentit Trump që e arriti gjatë mandatit të parë. Serbia nuk është pengesë – ne jemi pjesë e zgjidhjes,” përfundoi Gjuriq.
Ai u bëri thirrje anëtarëve të Këshillit të Sigurimit dhe bashkësisë ndërkombëtare që të dënojnë shkeljet e të drejtave të serbëve në Kosovë dhe të garantojnë, siç tha ai, “paqen dhe bashkëjetesën e vërtetë”.
