Ambasadori i Serbisë në Amerikë, Marko Gjuriq, ka thënë se në bazë të deklaratave të emisarit të ShBA-ve për Ballkanin Perëndimor, Gabriel Escobar dhe ambasadorit, Christopher Hill, shihet se ata kërkuan një Asociacion me Shumicë Serbe më shumë se shumë vende që nuk e kanë njohur Pavarësinë e Kosovës.
Tutje, ai është shprehur se: “Administrata e Uashingtonit ka qenë vazhdimisht më e zëshme se të tjerët në këmbënguljen për formimin e Asociacionit të Komunave me Shumicë Serbe, madje duke deklaruar se ajo duhet të formohet, me ose pa Kurtin”.
Gjuriq përmes një interviste në Kurir, tha se me pjesëmarrjen e kreut të shtetit serb në bisedimet në Bruksel do të thotë se Serbia do të prezantohet në mënyrë dinjitoze.
“Pjesëmarrja e presidentit Vuçiq në bisedimet në Bruksel do të thotë se Serbia do të prezantohet në mënyrë dinjitoze, stabile, me përgjegjësi strategjike dhe të menduar dhe vërtetë patriotike. E them këtë si dikush që merr pjesë në biseda të tilla për më shumë se një dekadë, herë si dëshmitar, herë si pjesëmarrës. Skuadra serbe me presidentin në krye do të luftojë për të marrë maksimumin për Serbinë në rrethana të tmerrshme ndërkombëtare”, deklaroi ai.
Ndërkaq, i pyetur për skenat që kanë ndodhur në Kuvendin e Serbisë, pasi që Vuçiq prezantoi planin për Kosovën, Gjuriq tha se disa deputet dërguan një imazh të keq për nivelin e kulturës politike të Serbisë.
“Shumë njerëz në Uashington më pyetën për ngjarjet në parlamentin tonë. Disa deputetë u diskredituan, por edhe dërguan një imazh të keq për nivelin e kulturës politike në vendin tonë dhe konfirmuan stereotipet negative për ne që ekzistojnë në publikun ndërkombëtar. Në të kundërt, sjellja e kreut të shtetit ishte e vëzhguar objektivisht, stoikisht dinjitoze, e matur dhe me elemente karakteri”, tha ai./teve1.info/
