Përgjatë muajve të fundit situata në veriun e Kosovës ka qenë goxha e ndjeshme.
E sipas përfaqësuesve të shoqërisë civile në Mitrovicën e Veriut, disa vendime që janë marrë nga niveli qendror kanë ndikuar negativisht tek komuniteti serb në Kosovë.
Megjithatë shqetësimi kryesor i tyre është gjuha e urrejtjes që po përdoret në mediet shqiptare dhe serbe.
Ata gjithashtu thonë se politikanët me gjuhën që po përdorin nuk po kontribuojnë në përmirësimin e marrëdhënieve ndër-etnike.
“Gjuha e urrejtjes është jashtëzakonisht e pranishme në jetët tona. Në shumë raste deklaratat e papërgjegjshme te politikanëve nga Kosova si dhe Serbia kanë pasur ndikim tek banorët lokal. Gjuha e pakontrolluar në medie po nxit tensione dhe po rrit ndjenjat nacionaliste mes komuniteteve. Mediet nuk duhet t’i japin hapësirë politikanëve që përdorin gjuhë të urrejtjes” , tha Dimitrije Obrenoviq nga OJA AKTIV.
E shqetësuar për këtë fenomen është shprehur edhe Ardita Zejnullahu nga Asociacioni i Mediave të Pavarura Elektronike të Kosovës.
Zejnullahu thotë se redaktoret e kanë për detyrë të ndërhyjnë aty ku ka gjuhë të urrejtjes.
“Në Kosovë politikanët shumë rrallë po paraqiten nëpër studio televizive. Ata kryesisht po iu drejtohen gazetarëve përmes konferencave për medie. Por, nëse transmetimi nuk është direkt dhe një politikan ka përdorur gjuhë të urrejtjes atëherë është detyrë e redaktorit që të ndërhyjë dhe të editohet materiali”, u shpreh Zejnullahu.
Kurse, kryeredaktori në RTV Kim, Goran Avramoviq, thotë se këto devijime ndodhin kur bota e biznesit përfshihet në media.
“Ne kemi shumë gazetarë profesionist shqiptar dhe serb që e kryejnë punën në mënyrë profesionale. Bashkëpunimi në baza individuale asnjëherë nuk ka munguar as gjatë kohës së luftës. Por situata ndryshon kur bota e biznesit përfshihet në medie atëherë ndodh ky devijim. Mediet duhet të lihen vetëm në dorën e gazetarëve profesionist” , tha ai.
Mes tjerash, përfaqësuesit e shoqërisë civile nga Mitrovica e Veriut e shohin si të domosdoshme që mediet shqiptare dhe ato serbe të bashkëpunojnë më ngushtë më njëra-tjetrën për të krijuar një mjedis më të sigurt për të gjitha komunitetet që jetojnë në Kosovë.
Ky raport është përpiluar nga organizata Aktiv.
