Bashkësia ndërkombëtare në vazhdimësi ka bërë thirrje për ulje të tensioneve e largim të barrikadave. Përkundër kësaj kërkese, serbët vetëm sa shtonin barrikadat.
Për tërë këto ditë, në opinionin publik është diskutuar për qasjen e butë të bashkësisë ndërkombëtare ndaj Serbisë, në lidhje me situatën në pjesën veriore të Kosovës.
Por, profesori universitar Arben Fetoshi, thotë se vendet perëndimore po përdorin një qasje strategjike në lidhje me situatën e krijuar në Kosovë.
“Pra duhet pasur parsysh atë që ka thënë edhe Ukshin Hoti, politika nuk komandohet prej emocioneve ose miqësisë, por prej interesave. E në qoftë se i referohemi gjeopolitikës aktuale pas agresionit rus në Ukrainë, duhet ta kuptojmë që interes strategjik i perëndimit dhe i Shteteve të Bashkuara të Amerikës aktualisht në rajon është shkëputja e Serbisë nga ndikimi i mëtejshëm dhe lidhja e saj tradicionale me Rusinë. Në këtë kontekst unë mendoj që duhet ta kërkojmë shpjegimin për një qasje mirëkuptuese ndaj bandave kriminale në veri të vendit tonë”, deklaroi Fetoshi.
Ndërkaq politologu Dorajet Imeri thotë se kjo qasje vjen si rezultat i investimet të madh që Serbia Kosovën ta distancoi nga bashkësia ndërkombëtare.
Një qasje më të prerë dhe me presion më direkt ndaj Serbisë, e ka shfaqur Gjermania. Para disa ditësh ministrja e jashtme gjermane Annalena Baerbock tha se Kosova i ka ulur tensionet me shtyrjen e zgjedhjeve, por retorika e fundit e Serbisë, sipas saj, bën të kundërtën.