Policia e Kosovës ka dhënë detaje shtesë lidhur me incidentin me armë zjarri që ka ndodhur në lagjen Kodra e Trimave në Prishtinë.
Sipas raportit 24-orësh të Policisë, më 31 janar 2026, rreth orës 15:20, në rrugën “Fahri Fazliu” ka ndodhur një incident mes dy grupeve, ku janë përfshirë katër persona të dyshuar.
Gjatë incidentit është raportuar përdorimi i armës së zjarrit, ndërsa më pas njëri nga të dyshuarit ka goditur me veturë një të dyshuar tjetër si dhe dy persona të tjerë, të cilët ishin dëshmitarë të ngjarjes.
Në vendin e ngjarjes kanë intervenuar njësitë policore, të cilat kanë gjetur dhe sekuestruar dy gëzhoja, një fishek dhe një predhë. Një person i dyshuar është arrestuar.
Krejt çfarë ndodhi në “Kodrën e Trimave” në Prishtinë pas të shtënave me armë zjarri – Detaje
Si pasojë e incidentit, tre persona kanë pësuar lëndime — një i dyshuar dhe dy dëshmitarë — të cilët janë dërguar për trajtim mjekësor në Qendrën Klinike Universitare të Kosovës (QKUK). I dyshuari është mbajtur për hospitalizim, ndërsa dy dëshmitarët janë liruar pas marrjes së trajtimit mjekësor.
Me vendim të prokurorit kompetent, i dyshuari i arrestuar është dërguar në mbajtje, ndërsa rasti po hetohet si “vrasje në tentativë” dhe “shkaktim i rrezikut të përgjithshëm”.
