Disa persona të maskuar dhe me armë në duar, u panë në mesnatë në rrugën “Bardhyl Qaush” në Prishtinë.
Ata shtien me armët e tyre, të cilat dyshohet të kenë qenë të tipit AK 47 dhe pistoletë.
Nga breshëria e plumbave janë dëmtuar dy vetura, njëra e tipit BMW dhe tjetra Mercedes. Pronarët e të cilave kanë dhënë dëshminë në Policinë e Kosovës për dëmet e shkaktuara”
Plumbat dëmtuan xhamat e veturës BMW si dhe gomat e veturës Mercedes.
Në vend të ngjarjes të martën dolën edhe hetuesit e Policisë së Kosovës të cilët mblodhën provat e rastit.
E personat e dyshuar janë larguar nga vendi i ngjarjes.
“Policia menjëherë ka dalë në vendin e ngjarjes dhe ka ndërmarrë të gjitha veprimet e nevojshme policore, të cilat kanë rezultuar me gjetjen e dy lloje gëzhojash. Policia po punon në mënyrë aktive për të mbledhur më shumë informacion rreth identifikimit të të dyshuarve, dhe në të njëjtën kohë po vijon punën hetimore me qëllim zbardhjen e plotë të rrethanave të kësaj ngjarjeje”, ka thënë zëdhënsi i Policisë në Prishtinë
Në lëvizje janë vënë edhe Prokuroria Themelore e Prishtinës.
“Lidhur me pyetjen tuaj ju njoftojmë, se në rrugën B është raportuar për të shtëna me armë zjarri. Njësitet relevante kanë dalë menjëherë në vendin e ngjarjes dhe kanë ndërmarrë veprimet e nevojshme hetimore. Deri më tani nuk ka persona të arrestuar lidhur me rastin”, kanë thënë nga Prokuroria
Rasti është cilësuar nga autoritetet si: Shkaktim i rrezikut të përgjithshëm, Mbajtje në pronësi, kontroll ose posedim të paautorizuar të armëve, Përdorim i armës apo mjetit të rrezikshëm.
