Klubi rus Zenit St. Petersburg është gjobitur me 213 euro e 21 cent për fyerjet e tifozëve ndaj sulmuesit të Rubin Kazanit, Mirlind Daku, gjatë ndeshjes së Kupës së Rusisë më 12 gusht, ku Zeniti fitoi 3:0. Daku shënoi një gol që më pas u anulua me VAR.
Zeniti kishte shprehur interes për transferimin e Dakut këtë verë dhe kishte arritur marrëveshje me Rubin Kazanin, por marrëveshja dështoi. Sipas mediave ruse, arsyeja ishin edhe faktorë jashtë sportit, përfshirë veprimin e Dakut në Euro 2024 dhe tatuazhin në nder të komandantit të UÇK-së, Agim Ramadani.
Daku është sulmuesi kryesor i Rubin Kazanit dhe një nga golashënuesit më të mirë në Rusi. Ai ka rinovuar kontratën deri në vitin 2029 dhe mund të fitojë deri në 3 milionë euro me bonuse.
