Avokati, Yll Zekaj ka thënë se kryeministri në detyrë i Kosovës, Albin Kurti me veprimet e tij ndaj Prkurorisë Speciale është duke kontribuar në atakimin e sistemit të drejtësisë.
Zekaj në emisionin “Ditari” në Tëvë1 ka shtuar se Kurti që nga fillimi i ftesës së parë të Speciales është tallur me të duke i caktuar orare dhe vende se ku duhet të intervistohet i njëjti.
“Kryeministri i cili ka ardhur në pushtet me kauzën për një sistem gjyqësor të pavarur, efikas, të pandikueshëm është duke kontribuar në atakimin e këtij sistemi. Që nga fillimi i ftesës së parë nga ana e Prokurorisë Speciale kryeministri në detyrë është tallur me institucionet e drejtësisë, është tallur me prokurorinë e Kosovës duke i caktuar orare, duke i caktuar vende se ku duhet të intervistohet i njëjti duke bërë dallimin apo shkëputjen e vetvetes nga qytetarët e Kosovës me të cilët është dashur të jetë i barabartë për shkak se kushtetuta e cila e përcakton si të tillë”, ka deklaruar Zekaj.
Kryeministri në detyrë, Albin Kurti të mërkurën është dënuar nga Gjykata e Prishtinës me 250 euro për shkak të mos paraqitjes në Prokurorinë Speciale (PSRK) për të dëshmuar lidhur me rastin e rezervave shtetërore.
Lidhur me këtë dënim gjatë ditës Kurti në një prononcim për media me ironi ka thënë se ndonjëherë e dënojnë atë, mirëpo i sugjeroi gazetarët që të mos mërziten për një gjë të tillë.
“Më dënojnë mua nganjëherë por mos u mërzitni ju”, tha Kurti./teve1.info/
