Gjykata Ndërkombëtare Penale (GJNP) ka thënë se “i dënon” sanksionet e reja të SHBA-së ndaj gjyqtarëve dhe prokurorëve të saj.
Të mërkurën, Departamenti Amerikan i Shtetit njoftoi sanksione të reja ndaj dy gjyqtarëve dhe dy prokurorëve në GJND për angazhimin në përpjekjet për të ndjekur penalisht qeveritarë amerikanë dhe izraelitë.
Sekretari i Shtetit Marco Rubio e akuzoi Gjykatën Ndërkombëtare Penale (GJPN) si një “kërcënim për sigurinë kombëtare” dhe “një instrument ligjor” kundër SHBA-së dhe Izraelit.
Kryeministri izraelit Benjamin Netanyahu e përshëndeti veprimin e SHBA-së. Gjykata Penale Ndërkombëtare ka lëshuar urdhër-arreste kundër Netanyahut dhe ish-ministrit të tij të mbrojtjes, Yoav Gallant, për krime lufte dhe krime kundër njerëzimit gjatë luftës së Izraelit në Gaza.
Kurse, Franca iu bashkua GJND-së në denoncimin e masës së SHBA-së, duke shprehur “shqetësim” pasi një nga gjyqtarët e saj, Nicolas Guillou, ishte midis atyre që u sanksionuan, ka shkruar BBC.
Tre zyrtarët e tjerë të GJPN-së të emëruar nga SHBA-të ishin gjyqtarja Kimberly Prost e Kanadasë, si dhe zëvendësprokurorët Nazhat Shameem Khan i Fixhit dhe Mame Mandiaye Niang i Senegalit.
Rubio dënoi “politizimin, abuzimin me pushtetin dhe tejkalimin e paligjshëm gjyqësor” të gjykatës në një deklaratë ku njoftonte sanksionet.
Gjykata Penale Ndërkombëtare është një gjykatë globale me fuqinë për të ngritur ndjekje penale për gjenocid, krime kundër njerëzimit dhe krime lufte.
Gjykata i quajti sanksionet e fundit “një sulm flagrant” ndaj pavarësisë dhe paanshmërisë së saj.
“Ato përbëjnë gjithashtu një fyerje kundër… rendit ndërkombëtar të bazuar në rregulla dhe, mbi të gjitha, miliona viktimave të pafajshme në të gjithë botën”, shtoi ajo.
