Të parët që erdhën ishin familjarët.
Këta po urojnë mirëseardhje të gjithë atyre që të martën erdhën në qendër të Skenderajt.
Gjithçka është bërë gati, për përurimin e një shtatoreje.
Bëhet fjalë për shtatoren e Leotrim Ahmetit, 7 vjecarit që u vra nga forcat serbe me 11 shtator të vitit ’98.
E kjo, krenar po e bën familjen Ahmeti nga Rezalla.
“Jo që është vëllai jonë, por kjo shtatore simbolizon të gjithë fëmijët e Kosovës që kanë jap jetën këtë vend”, tha vëllai i Leotrimit, Bahri Ahmeti.
E përurimi i kësaj shtatore, po behët në ditën e çlirimit të Skenderajt.
Ani pse Leotrimi nuk e pa këtë ditë, atë po e gëzojnë bashkëmoshatarët e tij.
Madje disa prej tyre erdhën nga Mitrovica, për ta nderuar 7 vjeçarin.
“Kemi ardh me pa përurimin e shtatores së djaloshit të vogël, Leotrim Ahmetit, që fatkeqësisht nuk feston sot me ne, por gjithmonë do ta përkujtojmë atë dhe dot mbetet gjithmonë në mendjet dhe zemrat tona”, tha Dina Kelmendi nxënëse e shkollës “Migjeni” në Mitrovicë.
E në mesditë qindra karrige të vendosura pranë Qendrës së Kulturës, u mbushën me të pranishëm.
Këtu nuk munguan as qeveritarët.
Para se gjithçka të fillonte, u shfaq garda e FSK-së.
Këta pranë shtatores ngritën lart flamurin shtetëror të Kosovës.
Më pas radha i erdhi intonimit të himnit kombëtar.
“Pyetja e vetme që sot parashtrohet, është se çfarë faji pati Leotrimi? Leotrimi kështu i heshtur, do të shërbejë si ciceron shpjegues i cili do të troket thellë në ndërgjegjen e shoqërisë sonë, por edhe në institucioneve tona vendore e ndërkombëtare”, tha kryetari i Skenderajt, Fadil Nura.
Nga foltorja, kritika pati për pushtetarët.
“Në Kosovë, nga dora e armikut tonë janë vrarë dhe zhdukur 1432 famijë kurse pushtetarët tanë ende nuk janë në gjendje së paku një herë në jetën e tyre ta thonë numrin e saktë të këtyre fëmijëve”, tha publicisti, Nusret Pllana.
Por, momenti i shumëpritur, erdhi vetëm në ora 14:00.
Leotrim Ahmeti, nga e marta do të qëndrojë përgjithmonë në qendrën e Skenderajt.
Fjalëpakë e emocionuar, ishte ajo që e lindi dhe rriti Leotrimin.
“Faleminderit prej të gjithëve që keni ardhur, faleminderit edhe ai që e ka punuar shtatoren. Faleminderit”, tha nënë e Leotrimit, Shukrije Ahmeti.
7 vjeçari u plagos në oborrin e shtëpisë së tij në Rezallë të Skenderajt, ndërsa ndërroi jetë në spitalin ushtarak në Gradicë të Drenasit.
8 muaj pas vrasjes së Leotrimit, në vijën e parë të frontit të luftës, heroikisht ra edhe babai i tij, komandant Malush Ahmeti.
