Kryetari i Aleancës, Ardian Gjini, ka zhvilluar një takim me eurodeputetin Riho Terras, raportuesin e përhershëm të Parlamentit Evropian për Kosovën.
Përmes një njoftimi në Facebook, Gjini bëri të ditur se gjatë takimit është diskutuar për proceset aktuale nëpër të cilat po kalon Kosova, me theks të veçantë në nevojën për krijimin sa më të shpejtë të institucioneve funksionale.
Ai theksoi se integrimi i Kosovës në NATO dhe Bashkimin Evropian duhet të mbetet prioritet strategjik, duke shtuar se AAK vazhdon të jetë e përkushtuar ndaj këtij orientimi.
“Integrimi në NATO dhe BE është mbi të gjitha interesat e tjera për Kosovën. Ashtu si gjithmonë, Aleanca vazhdon të qëndrojë fuqishëm në orientimin e saj për arritjen e këtyre caqeve”, ka shkruar Gjini.
Sipas tij, Kosova po kalon një periudhë të vështirë si pasojë e, siç e cilësoi ai, papërgjegjësisë politike. Gjini përmendi humbjen e fondeve të Bashkimit Evropian, rrezikimin e proceseve integruese, si dhe sfidat ekonomike dhe institucionale me të cilat po përballet vendi.
Në fund, ai e falënderoi eurodeputetin Riho Terras për angazhimin e tij në mbështetje të Kosovës dhe për përkushtimin që vendi të avancojë në rrugën drejt integrimit evropian.
“E falënderova raportuesin Terras për punën e tij dhe për insistimin që Kosova të bëjë hapa përpara në rrugën e integrimit drejt BE-së”, ka deklaruar Gjini.
