Kryetari i Aleancës, Ardian Gjini ka vlerësuar suksesin e sportistëve kosovarë në Lojërat Mesdhetare “Taranto 2026”.
Gjini ka shprehur mirënjohje për sportistët që, sipas tij, e përfaqësuan Kosovën me dinjitet, profesionalizëm dhe përkushtim.
Ai ka veçuar medalistët Donjeta Sadiku, Islam Selmani, Laura Fazliu, Kianoush Rostami, Akil Gjakova, Flaka Loxha, Fatjona Kasapi dhe Shpati Zekaj, duke thënë se ata e ngritën flamurin e Kosovës në mesin e flamujve fitimtarë të Lojërave Mesdhetare.
“Sot, kur politikës kosovare po i bëhet gjithnjë e më e vështirë të depërtojë në institucionet ndërkombëtare, sportistët tanë, si ambasadorët më të mirë të Kosovës në arenën ndërkombëtare, po hapin rrugë dhe po e përfaqësojnë Kosovën si shtet të barabartë me çdo shtet tjetër në botë”, ka shkruar Gjini.
Ai ka theksuar se suksesi i sportistëve merr rëndësi të veçantë edhe për faktin se Lojërat e ardhshme Mesdhetare, në vitin 2030, do të zhvillohen në Kosovë.
Megjithatë, Gjini ka kërkuar që shteti të jetë më pranë sportistëve, duke theksuar nevojën për investime në infrastrukturë dhe financim adekuat.
“Është detyrim i yni institucional t’u krijojmë kushte të dinjitetshme infrastrukturore dhe financim adekuat, në mënyrë që të krijojmë strategji të qëndrueshme shtetërore për sportin”, ka deklaruar ai.
Në fund, Gjini ka uruar sportistët kosovarë për sukseset e arritura dhe u ka dëshiruar triumfe të reja në të ardhmen./teve1.info/
