Kryetari i komunës së Gjakovës, Ardian Gjini ka reaguar pas arrestimit të katër zyrtarëve nga Drejtoria e Urbanizmit dhe nga ajo e Kadastrit të kësaj komune.
Gjini e ka cilësuar si të panevojshëm arrestimin e tyre, duke u shprehur i bindur në ndershmërinë dhe profesionalizmin e kolegëve dhe ish-kolegëve të tij.
“Jam sinqerisht i befasuar me arrestimin e ish-kolegëve dhe kolegëve të mi. E shoh këtë arrestim si plotësisht të panevojshëm derisa kjo ngjarje ka shkaktuar shqetësim të kuptueshëm – si brenda institucionit, ashtu edhe në opinionin publik. Jam i bindur në ndershmërinë dhe profesionalizmin e kolegëve dhe ish-kolegëve të mi”, ka shkruar ai në Facebook.
Tutje, ai ka kërkuar që Prokuroria ta sqarojë me fakte konkrete se për çfarë akuzohen të dyshuarit, e jo sipas tij me terma të përgjithshëm si “shpërdorim detyre”.
“Prandaj, besoj se është e domosdoshme që Prokuroria të sqarojë qartë dhe publikisht për çfarë konkretisht po akuzohen ata – jo me terma të përgjithshëm si “shpërdorim detyre”, por me fakte konkrete. Qytetarët kanë të drejtë të informohen drejt, sidomos në një periudhë kaq të ndjeshme si kjo para zgjedhjeve. Gjithmonë kam besuar dhe besoj në drejtësi. Por është detyrë edhe e organeve të drejtësisë që ta mbrojnë sistemin nga çfarëdo ndërhyrje që e cenon besimin e qytetarëve në vet atë sistem. Të gjithë duhet t’i nënshtrohen sundimit të ligjit, e ligji duhet të jetë i drejtë”, ka përfunduar Gjini.
Arrestohet drejtori i Urbanizmit dhe tre zyrtarë të tjerë në Gjakovë
