Partia Aleanca ka akuzuar Lëvizjen Vetëvendosje për sulm ndaj shtetit dhe për shkatërrim të rendit kushtetues.
Kryetari i kësaj partie, Ardian Gjini pas mbledhjes së kryesisë së partisë ka thënë se do të angazhohen në mbrojtje të shëtit dhe se do të përdorin çdo rrugë politike për rikthimin e normalitetit.
“Partia që ka fituar zgjedhjet po i bën sulm vetë shtetit përmes ligjeve që cenojnë pavarësinë e institucioneve, duke shkatërruar rendin kushtetues. Ky çmontim i shtetit po degradon ekonominë, shëndetësinë dhe arsimin, duke dëmtuar rëndë imazhin tonë në botë. Kosova është më e madhe se çdo krizë politike e shkaktuar artificialisht si kjo që po shohim sot. Si Aleancë, do të vazhdojmë të angazhohemi në mbrojtje të projektit tonë shtetëror dhe do të përdorim çdo rrugë politike për të rikthyer normalitetin dhe zhvillimin në vend”, ka shkruar Gjini.
Ai ka thënë se kjo parti pas përfundimit të procesit zgjedhor ka qenë i qartë dhe konstruktiv për formimin e institucioneve.
Gjini ka thënë se zotimi i pranimit të gjashtë pikave të paraqitura nga kjo parti, do t’i jepte fund ngërcit politik.
“Si Aleancë, ne kemi hartuar një ofertë të qartë të dedikuar për qytetarët, e cila po injorohet totalisht nga partia e parë e dalë nga zgjedhjet, edhe pse zotimi ndaj këtyre pikave do të çonte menjëherë në tejkalimin e këtij ngërçi politik. Në vend të zgjidhjes, sot po shohim një shpërfillje të pafalshme ndaj Kushtetutës së Kosovës, ku pas shkeljes dhe djegies së afateve për konstituimin e Kuvendit, Kosova rrezikon bllokadën totale”, ka shkruar ai.
