Kryetari i Aleancës, Ardian Gjini, ka deklaruar se partia e tij është e gatshme të kontribuojë në formimin e institucioneve të reja, por kërkon një zotim të qartë me shkrim për ndërmarrjen e veprimeve që, sipas tij, janë në interes të qytetarëve të Kosovës.
Në një konferencë për media, Gjini tha se AAK nuk do të pengojë krijimin e institucioneve dhe, nëse është e nevojshme, do të sigurojë edhe kuorumin për votime.
“Kjo nënkupton që nuk do të pengojmë themelimin e institucioneve, në asnjë mënyrë, nëse ka nevojë për kuorum, do ta bëjmë kuorumin, por na duhet zotimi i pastër me shkrim që këto veprime do të ndërmerren, në kundërvlerë nuk kërkojmë asgjë”, tha Gjini.
Ai u ndal edhe te mundësia që Ramush Haradinaj të propozohet për president të Kosovës, duke theksuar se një gjë e tillë do të ishte nder për partinë, por nuk është kusht për mbështetje.
“Nëse Ramush Haradinaj do të propozohet për president, vlen e njëjta formulë, për ne do të ishte nder, por nuk jemi duke e vendosur si kusht. Ne mendojmë që Kosova nuk do të mund të kishte president më të mirë se Ramush Haradinaj, mirëpo nuk po duam ta bllokojmë Kosovën për këtë bindje tonën”, u shpreh ai.
Gjini shtoi se AAK nuk po kërkon poste apo pozita në këmbim të mbështetjes, por synon që, sipas tij, pesha politike e partisë të përdoret për përmirësimin e jetës së qytetarëve.
“Jemi të gatshëm edhe të bëjmë kuorum, por po kërkojmë diçka për qytetarin e Kosovës, jo për vete. Nuk duam as ministra, as zëvendësministra, as ambasadorë, as borde, asgjë, por nuk guxojmë të jemi indiferentë dhe të mos e përdorim peshën tonë politike për ta rregulluar jetën e qytetarëve”, tha Gjini.
