Nënkryetari i Aleancës për Ardhmërinë e Kosovës, Ardian Gjini, ka thënë se në rrethanat aktuale ka qenë e vlefshme që të arrihet marrëveshja.
Madje, Gjini ka thënë se do të ishte e dëmshme nëse kryeministri i Kosovës, Albin Kurti dhe presidenti i Serbisë, Aleksandar Vuçiq nuk do të arrinin marrëveshje.
“Në rrethanat që gjendet Kosova, Ballkani, Evropa dhe e gjithë bota, ka qenë e vlefshme me u arrit një marrëveshje. Secili prej nesh do donte me pasë edhe elemente tjera në marrëveshje diçka me shtu, diçka me largu. D.m.th., vetëm nëse e kishim shkruar vetë, kishim me shkru krejt ndryshe, mirëpo kishte me qenë jashtëzakonisht dëm i madh nëse nuk kishim mbërri në marrëveshje”, ka thënë Gjini në emisionin “InfoNata” nëTëvë1.
Sipas Gjinit, marrëveshja është ligjërisht e obligueshme, sepse dakordimi është në prezencë të ndërmjetësuesve.
“Në këto rrethana është mirë që është kryer marrëveshja, po besoj që të gjithë ata që kuptojnë se çfarë ndodhë në marrëdhëniet ndërkombëtare e dinë që marrëveshja është obligative. Është ligjërisht obligative për shkak se elementet kryesore të marrëveshjes janë, është dakordimi në prezencë të ndërmjetësuesve, ndërmjetësuesit janë palë serioze dhe në të njëjtën kohë ka pasur deklarim publik nga të dyja palët që e pranojnë marrëveshjen pavarësisht se a është përafruar apo nënshkruar”, ka shtuar nënkryetari AAK-së.
Gjatë takimit të së shtunës në Ohër, kryeministri Kurti dhe presidenti Vuçiq janë pajtuar që ta implementojnë aktin e zbatimit të marrëveshjes së dakorduar më 27 shkurt në Bruksel. Ndërkaq, Kurti, bëri të ditur se u arrit pajtim publik për një aneks që udhëzon zbatimin e Marrëveshjes, derisa akuzoi Serbinë se i iku sërish nënshkrimit.
