Kryetari i Aleancës, Ardian Gjini, pretendon se Lista Serbe po e ndihmon Lëvizjen Vetëvendosje në realizimin e agjendave.
Gjini ka thënë se zvarritja e proceseve në Kosovë po bëhet siç do Vetëvendosje.
“Me koordinim apo pa koordinim, Lista Serbe po ndihmon që Albin Kurti ta zhvillojë agjendën e vet qysh i konvenon. Është një maskaradë për ta zvarritur procesin. Sot të gjithë e kuptojnë drejt pse Aleanca nuk ka pranuar të bëhet pjesë e kësaj maskarade. I ftoj, qysh i kam ftuar edhe më herët, edhe dy partitë e tjera në opozitë që mos të bëhen pjesë e kësaj maskarade”, ka deklaruar Ardian Gjini.
Ai vlerëson se synimi i VV-së është që ta dërgojë vendin në zgjedhje.
“Duhet të mbërrihet së paku data 30 shtator, në mënyrë që kur të kalkulohet edhe 60-ditëshi, edhe 45 ditë deri në shkuarjen në zgjedhje, partia që i ka fituar zgjedhjet e kaluara ta mbërrijë datën 27 dhjetor. Pse datën 27 dhjetor? Sepse këta njerëz që e kanë uzurpuar pushtetin në Kosovë, e kanë humbur besimin e qytetarëve që jetojnë këtu. Jeta është bërë më e rëndë”, theksoi Gjini.
