Kreu i Aleancës, Ardian Gjini ka kritikuar kryeministrin në detyrë dhe njëherësh kryetarin e LVV-së Albin Kurti, lidhur me situatën politike dhe institucionale në vend.
Gjini ka deklaruar se Kurti po ndjek data të caktuara për zgjedhjet e reja, duke pretenduar se synimi i tij është që ato të mbahen më 22 nëntor ose më 27 dhjetor.
Sipas kreut të AAK-së, veprimet e Kurtit për caktimin e datës së zgjedhjeve janë në kundërshtim me Kushtetutën dhe po e dëmtojnë funksionimin institucional të vendit.
“Fatkeqësisht politika s’po prodhon lajme të mira. Janë dy vite në krizë të qëllimshme institucionale. Thirrja e seancës më 9 shtator është shkelje brutale e normës dhe bindjes kushtetuese. Kjo është me u tallë me shtetin e me qytetarët”, ka thënë Gjini në konferencë për media.
Ai ka kritikuar edhe partitë e tjera politike, duke u bërë thirrje që, sipas tij, të mos bëhen pjesë e asaj që e konsideron shkelje të Kushtetutës.
Gjini ka paralajmëruar se vazhdimi i kësaj situate mund të ketë pasoja afatgjata për vendin.
“Kjo mënyrë e sjelljes ndaj Kosovës është mënyra më e sigurt me e sjell në cep të shkatërrimit një shtet. Do të na duhen vite ta riparojmë dëmin e shkaktuar nga një person i vetëm”, ka deklaruar ai.
Kreu i AAK-së ka thënë se partia e tij ka mbajtur, sipas tij, “rrugën të hapur” për një zgjidhje institucionale, ndërsa ka pretenduar se pushteti nuk ka pasur vullnet për të gjetur një zgjidhje.
“Siç iu kam thënë, jemi dëshmitarë se krejt çka ndjek ky pushtet është me e caktu datën vetë. Ose 22 nëntorin ose 27 dhjetorin”, ka deklaruar Gjini.
