Nënkryetari i Aleancës për Ardhmërinë e Kosovës (AAK), Ardian Gjini, ka bërë të ditur se është propozuar si kandidat për kryeministër dhe bartës i listës zgjedhore të partisë në zgjedhjet e parakohshme parlamentare.
Pas takimit me ushtruesen e detyrës së presidentes, Albulena Haxhiu, Gjini ka deklaruar në konferencë për media se vendimi përfundimtar ende nuk është marrë dhe se ai pritet të konfirmohet nga Këshilli Drejtues i AAK-së.
“Vendimet në Aleancë i merr Këshilli Drejtues. Unë jam i propozuar për kandidat për kryeministër dhe për bartës të listës, por duhet me e prit vendimin e Këshillit Drejtues që besoj se do të ndodhë shumë shpejt,” ka thënë Gjini.
Ai ka shtuar se AAK-ja është në fazën e përgatitjeve për zgjedhje dhe e sheh këtë proces si një garë të rëndësishme politike.
“Aleanca është duke u bërë gati për një betejë e cila ka të bëjë me atë që t’i japim Kosovës një qeveri normale, një qeveri e cila ka fjalë të buta dhe punë serioze. Deri tani kemi parë fjalë shumë të forta dhe pak punë. Kosova e ka edhe një shans dhe ne po përgatitemi që t’ia japim Kosovës këtë shans,” ka deklaruar ai./teve1.info/
