Kryetari i Aleancës, Ardian Gjini ka deklaruar se historia e luftës së UÇK-së dhe rruga e Kosovës drejt lirisë, sipas tij, nuk mund të njollosen.
Gjini, gjatë fjalimit në “Marshin për Liri” në Prishtinë, tha se qytetarët përmes këtij organizimi po përcjellin një mesazh për gjithë botën, për miqtë që e mbështetën Kosovën në vitin 1999, por edhe për kundërshtarët e saj.
“Gjithë këta njerëz i flasin gjithë botës. Sot i flasim edhe njëri-tjetrit, miqve që na kanë dëgjuar më 1999, po ju flasim edhe armiqve. Po ju flet populli i lirë i Kosovës”, tha Gjini.
Ai foli edhe për luftën e UÇK-së, duke theksuar se ajo, sipas tij, ishte zhvilluar kundër forcave që kishin kryer krime ndaj popullatës shqiptare në Kosovë.
Gjini kritikoi akuzat ndaj ish-krerëve të UÇK-së dhe tha se populli i Kosovës nuk duhet të lejojë që historia e luftës për liri të njolloset.
“Kemi me i prit edhe tri ditë edhe 19 orë. Poshtërsia më e thellë njerëzore është që ata që e kanë kryer krimin i akuzojnë të tjerët për krime. Kurrë askush nuk ka me mbërritë me ndot tregimin tonë për liri”, u shpreh ai.
Gjini tha se qytetarët do ta presin vendimin për ish-krerët e UÇK-së, duke përsëritur bindjen se historia e Kosovës dhe lufta për liri do të mbeten të paprekura.
