Të premten pritet të mbahet seanca e 45-të për konstituim të Kuvendit, pasi që dështimet për konstituimin po vazhdojnë edhe pasi Gjykata Kushtetuese e Kosovës i ka obliguar deputetët që ta bëjnë Kuvendin më së largu deri më 26 korrik.
E për këtë, anëtari i Kryesisë së AAK-së, Labinot Gjini ka deklaruar se nuk pret asgjë të re nga kjo seancë pasi që sipas tij, kjo situatë do të vazhdojë deri në afatin e fundit për konstituim të Kuvendit.
Derisa, ai ka kritikuar partinë e parë për propozimin e votimit në mënyrë të fshehtë, duke thënë se nuk mund ta bënë një shkelje të Kushtetutës.
Sipas Gjinit, Albulena Haxhiu s’është në interesin e shtetit që të jetë kryetare e Kuvendit.
“Kjo situatë është bërë e tepërt për secilin prej nesh dhe unë pres që edhe nesër nuk do të ketë konstituim të Kuvendit, do të vazhdojë deri në minutazhin e fundit. Besoj që kjo krizë ka zgjatur mjaftueshëm. Ne e dimë që të gjithë duhet ta konstituojmë Kuvendin gjë që e thotë edhe Gjykata Kushtetuese. Ne nuk mund të votojmë kundër një akti i cili është antikushtetues, nuk mundesh të ndryshosh procedurat për qejf dhe të bëjmë votim të fshehtë, nuk lejohet një gjë e tillë. Këtu kemi të bëjmë me shkelje të Kushtetutës. Albin Kurti do ta mbajë ngërçin për arsye të tija, strategji të ulëta politike. Interesi i shtetit nuk është që Albulena Haxhiu të jetë kryetare e Kuvendit të Kosovës, patjetër që LVV-ja duhet të lëshojë pe, duhet ta provojë një kandidatë tjetër… Ne ose duhet t’i kthehemi popullit me zgjedhje të reja ose deputetët, partitë politike të cilat e shohin se ngërçi është i qartë se është Albin Kurti, duhej ta thërrasin popullin në demonstrim të forcës përballë Kurtit i cili është uzurpues”, ka deklaruar Gjini në emisionin “Ditari” në tëvë1./teve1.info/
