Deputeti i AAK-së, Labinot Gjini, ka përshëndetur vendimin e fundit të Gjykatës Kushtetuese, duke e cilësuar si një fitore të demokracisë dhe një rikthim të rendit kushtetues në Kosovë.
“Më në fund kemi një zgjidhje, më në fund i përgjigjet asaj që kishte kërkuar Aleanca në kërkesën e saj. Shumica nuk e kanë trajtuar, por është kërkesë e Aleancës për Ardhmërinë e Kosovës që të kemi këto vendime. E prisnim këtë përgjigje qysh në aktgjykimin e parë. Sepse, ishte edhe pyetja jonë”, deklaroi Gjini në emisionin “Ditari” në Tëvë1.
Ai kritikoi ashpër qasjen e kryeministrit Albin Kurti, duke e akuzuar për bllokim të qëllimshëm të Kuvendit dhe cenim të rendit kushtetues për disa muaj me radhë.
“Në këtë rast, më në fund fitoi demokracia dhe fituan institucionet e Kosovës, sepse ju të gjithë e keni parë që ka qenë skandaloze për këta muaj, ku Kurti e ka bllokuar Kuvendin dhe e kishte rrezikuar fuqishëm rendin kushtetues kohëve të fundit”, tha ai.
Gjini tha se aktgjykimi i fundit i Kushtetueses e vendos sërish në binarë rendin demokratik dhe ofron zgjidhje për ngërçin institucional të krijuar pas zgjedhjeve.
Ai e quajti vendimin si një hap të rëndësishëm drejt normalizimit të punës së Kuvendit dhe funksionimit të institucioneve kushtetuese. /teve1.info/
