Objekti i Gjimnazit “Kuvendi i Lezhës” në Viti është duke u rinovuar krejtësisht. Kësisoj nxënësit po vijojnë mësimin në dy shkolla tjera të kësaj komune, ku thonë se po u shkaktohet vështirësi në mësim. E drejtori i kësaj shkolle shprehet optimist se punimet do të kryhen sa më parë, teksa nga Komuna thonë se i gjithë investimi është nga fondacioni IPA.
Ani pse nuk janë nxënës të saj, mësimin po e vijojnë në shkollën e mesme Profesionale “Jonuz Zejnullahu” në Viti.
Kjo për shkak se objekti i Gjimnazit “Kuvendi i Lezhës” në këtë komunë, është duke u rinovuar krejtësisht.
E Për këtë, gjimnazistët po thonë se ndërrimi i objektit shkollor po u shkakton vështirësi në mësimnxënie, andaj kërkojnë të kthehen sa më shpejt atje.
Se ka vështirësi në procesin mësimor, e thotë edhe drejtori i kësaj shkolle Mujë Tafa.
Porse shprehet optimist që punimet të përfundojnë në afatin e caktuar dhe kështu nxënësit t’i rikthehen normalitetit.
Për të gjitha këto thonë se janë në dijeni edhe nga Komuna e Vitisë.
Zyrtari komunal, Zijadin Ahmeti tregon se i gjithë financimi është nga fondacioni IPA andaj thonë se presin të përfundojnë sa më parë punimet.
Kjo shkollë numëron mbi 800 nxënës, një pjesë e të cilëve aktualisht po e vijojnë mësimin edhe në një shkollë fillore në këtë qytet.